வீட்டின் பீரோவை உடைத்து நகை, பணம் திருட்டு

அரியலூர் மாவட்டம் செந்துறை அருகே உள்ள மத்துமடக்கி கிராமத்தை சேர்ந்தவர் கண்மணி (வயது 35). இவரது கணவர் வெளிநாட்டில் வேலை செய்து வருகிறார் இந்த நிலையில் நேற்று முன்தினம் கண்மணி தனது தாயார் ஊரான பரணம் கிராமத்திற்கு சென்றுள்ளார். நேற்று முன்தினம் காலை வீட்டின் கேட்டு உடைக்கப்பட்டு இருப்பதை கண்டு அதிர்ச்சி அடைந்த பக்கத்து வீட்டை சேர்ந்த சுமதி என்பவர் கண்மணிக்கு தகவல் ெதரிவித்தார். இதையடுத்து அவர் வீட்டுக்கு வந்து பார்த்தபோது வீட்டில் இருந்த பீரோ உடைக்கப்பட்டு அதிலிருந்த 3 பவுன் தங்க நகைகள் மற்றும் ரூ.20 ஆயிரம் ஆகியவற்றை மர்ம ஆசாமிகள் திருடி சென்றது தெரியவந்தது. இந்த சம்பவம் குறித்து கண்மணி அளித்த புகாரின் பேரில் இரும்புலிக்குறிச்சி போலீசார் சம்பவ இடத்துக்கு விரைந்து சென்று விசாரணை நடத்தினர். பின்னர் மோப்ப நாய் மற்றும் கைரேகை நிபுணர்கள் வரவழைக்கப்பட்டு தடயங்கள் சேகரிக்கப்பட்டன. இந்த சம்பவம் குறித்து இரும்புலிக்குறிச்சி சப்-இன்ஸ்பெக்டர் செல்வகுமார் வழக்குப்பதிவு செய்து தப்பி ஓடிய மர்ம ஆசாமிகளை வலைவீசி தேடி வருகிறார்.