பீரோவை உடைத்து நகை, பணம் திருட்டு

தேவகோட்டை

சிவகங்கை மாவட்டம் தேவகோட்டை பெரியகாரை சேண்டல்பெரியான் கிராமத்தைச் சேர்ந்த கண்ணப்பன் மனைவி கண்ணாத்தாள் (வயது 70). இவர் தேவகோட்டை தினசரி காய்கறி மார்க்கெட்டில் சாலையோர வியாபாரம் செய்து வருகிறார். இவர் தினமும் தனது கிராமத்தில் இருந்து அதிகாலையில் தேவகோட்டை தினசரி மார்க்கெட்டில் காய்கறி விற்பனை செய்துவிட்டு மதியம் வீடு திரும்புவதை வழக்கமாகக் கொண்டுள்ளார். நேற்று வழக்கம்போல் காய்கறி விற்பனைக்காக சென்றுவிட்டு மதியம் வீட்டிற்கு வந்து பார்த்தபோது கதவு உடைக்கப்பட்டு திறந்து கிடந்தது. இதனால் அதிர்ச்சி அடைந்த அவர் வீட்டிற்குள் சென்று பார்த்தார். அப்போது உள்ளே இருந்த இரண்டு பீரோக்களும் திறந்து பொருட்கள் சிதறிக் கிடந்ததை கண்டு அதிர்ச்சி அடைந்தார். மேலும் பீரோவில் இருந்த 7 பவுன் நகை மற்றும் ரூ.10,000 பணம் ஆகியவை திருடு போயிருந்தது. இதுகுறித்து தேவகோட்டை இன்ஸ்பெக்டர் சரவணன், வழக்கு பதிவு செய்து விசாரணை நடத்தி வருகிறார்.