இருதரப்பினர் மோதல்; 4 பேர் கைது

மானூர்:

மானூர் அருகே களக்குடி புதுக்குளம் தெருவை சேர்ந்தவர் இசக்கிமுத்து மகன் இசக்கிராஜா. கல்லூரி மாணவர். இவர் தனது தெருவில் நடந்து வந்தபோது, அதே ஊரின் மற்றொரு பகுதியைச்சேர்ந்த பிரகாஷ் என்பவர் ஓட்டி வந்த மோட்டார் சைக்கிள் நிலைதடுமாறி இசக்கிராஜா மீது மோதியதாம். இதனை இசக்கி ராஜா தட்டிக்கேட்கவே, ஆத்திரமடைந்த பிரகாஷ் தனது பகுதியைச்சேர்ந்த நவநீதகிருஷ்ணன் மகன் கார்த்திக், (வயது 21), மகாராஜா, கோபால் மகன் சங்கர் கணேஷ் (28) ஆகிய மூவருடன் வந்து இசக்கிராஜாவை அவதூறாக பேசி இரும்பு கம்பியால் தாக்கினர்.

இதனை தொடர்ந்து இசக்கி ராஜா, தனது தரப்பினரான அதே ஊரைச் சேர்ந்த சுப்பிரமணியன் மகன்கள் ஸ்ரீகாந்த் (27), மாயாண்டி, முருகன் மகன் மதன் (25) மற்றும் நெல்லை டவுன் மலையாளமேட்டை சேர்ந்த மணி ஆகியோருடன் பிரகாஷ் வசிக்கும் தெருவிற்கு சென்று, அங்கிருந்த கார்த்திக் என்பவரை தாக்கினர். இதில் காயம் அடைந்த கார்த்திக் பாளையங்கோட்டை அரசு மருத்துவமனையில் சிகிச்சையில் உள்ளார்.

சம்பவங்கள் குறித்து இருதரப்பினரும் தனித்தனியே அளித்த புகாரின் பேரில் மானூர் போலீசார் வழக்குப்பதிவு செய்து சங்கர்கணேஷ், மதன், ஸ்ரீகாந்த் மற்றும் இசக்கிராஜா ஆகிய 4 பேரை கைது செய்தனர்.