இரு தரப்பினர் மோதல்; 3 பேர் படுகாயம்

ஏர்வாடி:

ஏர்வாடி அருகே ஒத்தக்கடை நடு தெருவைச் சேர்ந்தவர் ஜார்ஜ் அருள் ஜோதி மகன் தினேஷ் ராஜா (வயது 41). இவர் லோடு ஆட்டோ ஓட்டி வருகிறார். ராமகிருஷ்ணாபுரம் நடு தெருவைச் சேர்ந்தவர் பிச்சைக்கண்ணு மகன் சுபாஷ் (29). இவர் கடந்த சில நாட்களுக்கு முன்பு லோடு ஏற்றுவதற்காக தினேஷ்ராஜாவின் லோடு ஆட்டோவை அழைத்தார். ஆனால் தினேஷ் ராஜா செல்ல மறுத்து விட்டார். இதில் அவர்களுக்கு இடையே தகராறு ஏற்பட்டு முன்விரோதம் இருந்தது.

இந்த நிலையில் நேற்று முன்தினம் சுபாஷ், அவருடைய நண்பர்களான கோயில்தாஸ் மகன் ராகவேந்திர சர்மா (28), சண்முகபுரத்தைச் சேர்ந்த தங்கத்துரை மகன் விக்னேஷ் (24), தளபதிசமுத்திரம் பிளசண்ட் நகரைச் சேர்ந்த வென்ஸ் மகன் ஆலன் (22) ஆகிய 4 பேரும் லோடு ஆட்டோவில் சென்று தினேஷ்ராஜாவை கம்பால் சரமாரியாக தாக்கினர்.

அப்போது தினேஷ்ராஜா, அவருடைய மனைவி தங்கப்பழம் ஆகிய 2 பேரும் சேர்ந்து சுபாஷையும், ராகவேந்திர சர்மாவையும் கம்பால் தாக்கினர். இதில் படுகாயமடைந்த தினேஷ் ராஜா வள்ளியூர் அரசு ஆஸ்பத்திரியிலும், சுபாஷ், ராகவேந்திர சர்மா ஆகிய 2 பேரும் நெல்லை அரசு ஆஸ்பத்திரியிலும் அனுமதிக்கப்பட்டு சிகிச்சை பெற்று வருகின்றனர். இதுகுறித்து இரு தரப்பினரும் அளித்த புகாரின்பேரில், தினேஷ்ராஜா, அவருடைய மனைவி தங்கப்பழம், சுபாஷ், ராகவேந்திர சர்மா, விக்னேஷ், ஆலன் ஆகிய 6 பேர் மீது ஏர்வாடி போலீசார் வழக்குப்பதிவு செய்து விசாரணை நடத்தி வருகின்றனர்.