பக்ரீத் பண்டிகை சிறப்பு தொழுகை

கோவை, ஜூலை

கோவையில் ஜாக் கமிட்டி சார்பில் பக்ரீத் பண்டிகை சிறப்பு தொழுகை நடந்தது. இதில் ஏராளமானோர் கலந்து கொண்டனர்.

சிறப்பு தொழுகை

தியாக திருநாள் என்று அழைக்கப்படும் பக்ரீத் பண்டிகை இன்று (ஞாயிற்றுக்கிழமை) கொண்டாடப்பட உள்ளது. இந்த நிலையில் கோவை மாவட்ட ஜாக் கமிட்டி சார்பில் நேற்று பக்ரீத் பண்டிகை கொண்டாடப்பட்டது. இதற்காக கோவை குனியமுத்தூரில் உள்ள ஆயிஷா திருமண மண்டபத்தில் நேற்று காலை சிறப்பு தொழுகை நடந்தது.

இதில் இமாம் பஷீர் கலந்து கொண்டு தொழுகை நடத்தினார். இதில் ஏராளமான இஸ்லாமியர்கள் கலந்து கொண்டு தொழுகையில் ஈடுபட்டனர். தொழுகை முடிந்ததும் ஒருவருக்கு ஒருவர் பக்ரீத் வாழ்த்துக்களைதெரிவித்துக்கொண்டனர். அத்துடன் சிலர் ஏழை-எளிய மக்களுக்கு உணவு உள்பட பல்வேறு நலத்திட்ட உதவிகளையும் வழங்கினார்கள்.இது குறித்து இஸ்லாமியர்கள் கூறியதாவது:-

ஆரோக்கியமாக வாழ வழிபாடு

சகோதரத்துவத்தை ஏற்படுத்தும் விதமாக தியாக திருநாள் கொண்டாடப்பட்டு வருகிறது. பொதுவாக பக்ரீத் பண்டிகை பிறை பார்த்து கொண்டாடப்படும். நாங்கள் உலகத்தில் எந்த இடத்திலும் பிறை தெரிந்தால் அந்த நாளில் கொண்டாடுவோம். அதன்படி நேற்று பிறை தெரிந்ததால் பக்ரீத் பண்டிகையை கொண்டாடி உள்ளோம்.

இதற்காக அதிகாலையிலேயே எழுந்து புத்தாடை அணிந்து சிறப்பு தொழுகையில் பங்கேற்ற பின்னர், ஆட்டு கிடாய்களை குர்பானி கொடுத்து அந்த இறைச்சியின் ஒரு பங்கை ஏழை-எளிய மக்களுக்கும், ஒரு பங்கை உற்றார் உறவினர்களுக்கும், ஒரு பங்கு எங்களுக்கும் என்று பிரித்து கொடுத்து உற்சாகமாக கொண்டாடினோம். மேலும் உலக மக்கள் நோய் நொடி இல்லாமல் ஆரோக்கியமாக வாழ வேண்டும் என்று சிறப்பு தொழுகையில் வழிபாடு நடத்தினோம்.

இவ்வாறு அவர்கள் கூறினார்கள்.