பள்ளி மாணவர்களுக்கு போலீஸ் நிலையத்தில் விழிப்புணர்வு நிகழ்ச்சி

ஆலங்குடி

புதுக்கோட்டை மாவட்டம், ஆலங்குடி அருகே அலஞ்சிரங்காடு குருகுலம் பள்ளியில் பயிலும் 80 மாணவர்களை கீரமங்கலம் போலீஸ் நிலையத்திற்கு அழைத்து சென்றனர். பின்னர் அங்கு காவல் துறை பற்றியும் காவல் நிலைய பணிகளைப் பற்றியும் விழிப்புணர்வு நிகழ்ச்சி நடைபெற்றது. போலீஸ் இன்ஸ்பெக்டர் பாஸ்கரன், மாணவர்கள் சூழ்நிலைகளுக்கு ஏற்றவாறு தங்களை எவ்வாறு தயார் செய்து கொள்வது, செல்போன் உபயோகிப்பதால் ஏற்படும் தீமைகள் மற்றும் பெண் குழந்தைகள் பாலியல் ரீதியான பிரச்சினைகளை எதிர்கொள்வது எப்படி என்பதை பற்றியும் கூறினார். மேலும் மாணவர்கள் எவ்வாறு காவல்துறை சார்ந்த படிப்புகளை பயில்வது, வேலைவாய்ப்பு எப்படி பெறுவது என்றும் விளக்கப்பட்டது.

மேலும் போதைப்பொருள் இல்லாத ஒரு மாணவ சமுதாயத்தை உருவாக்குவது தொடர்பாகவும் பல்வேறு கருத்துக்களை கூறினர். முடிவில் குருகுலம் பள்ளி சார்பில் போலீசாருக்கு மரக்கன்றுகளை பள்ளி மாணவர்கள் வழங்கினர்.