மவுண்ட்பார்க் பள்ளியில் பரிசளிப்பு விழா

தியாகதுருகம்.

தியாகதுருகம் மவுண்ட்பார்க் மேல்நிலைப்பள்ளியில் தமிழ்நாடு மாநில கோ கோ கழகத்தின் சார்பில் பெண்களுக்கான மாநிலக்குழு சாம்பியன்ஷிப் போட்டி நடைபெற்றது. இதில் தமிழகத்தில் உள்ள 18 மாவட்டங்களில் இருந்து வீராங்கனைகள் கலந்து கொண்டு தங்களது திறமையை வெளிப்படுத்தினர். 2 நாட்கள் நடைபெற்ற இந்த போட்டிகளில் கிருஷ்ணகிரி மாவட்ட அணி முதலிடத்தையும், சிவகங்கை மாவட்ட அணி 2-வது இடத்தையும் பெற்று சாதனை படைத்தது. இதையடுத்து வெற்றி பெற்ற அணிகளுக்கு பரிசளிப்பு விழா மவுண்ட்பார்க் மேல்நிலைப்பள்ளியில் நடைபெற்றது. இதற்கு மவுண்ட்பார்க் பள்ளி தாளாளர் மணிமாறன் தலைமை தாங்கினார். இன்ஸ்பெக்டர் ராமதாஸ், தமிழ்நாடு மாநில கோ கோ கழக மாநில பொதுச் செயலாளர் நெல்சன் மண்டேலா, உடற்கல்வி ஆய்வாளர் ராஜேந்திரன் ஆகியோர் முன்னிலை வகித்தனர். உடற்கல்வி இயக்குனர் அரங்க வேல்முருகன் வரவேற்றார். விழாவில் முதலிடம் பிடித்த கிருஷ்ணகிரி அணிக்கு பரிசு மற்றும் கோப்பையை மவுண்ட்பார்க் பள்ளி தாளாளர் மணிமாறன் வழங்கி பாராட்டி பேசினார். 2-வது இடத்தை பிடித்த சிவகங்கை மாவட்ட அணிக்கும், 3-வது இடத்தை பிடித்த ஈரோடு மற்றும் கன்னியாகுமரி அணிகளுக்கும் பரிசு வழங்கப்பட்டது. இதில் கோ கோ கழக நிர்வாகிகள் சிவாஜி, செந்தமிழ்ச்செல்வன், ராதாகிருஷ்ணன், பாலகிருஷ்ணன், வீரமுத்து, சங்கர், பாலாஜி, சதீஷ்குமார் உள்ளிட்ட பலர் கலந்து கொண்டனர்.