டியூசனுக்கு சென்ற மாணவர்கள் மீது தாக்குதல்; போலீசார் குவிப்பு

பாவூர்சத்திரம்:

பாவூர்சத்திரம் அருகே மேலப்பாவூரைச் சேர்ந்த மாணவர்கள் சிலர் நேற்று மாலை டியூசன் படிப்பதற்காக மேலப்பாவூரில் இருந்து குளத்தின் கரை வழியாக கீழப்பாவூருக்கு சென்றனர். அப்போது சிலர் அவர்களை வழிமறித்து தாக்கியதாக கூறப்படுகிறது. இதில் 3 பேர் காயமடைந்தனர். அவர்கள் தென்காசி அரசு ஆஸ்பத்திரிக்கு சிகிச்சைக்காக அனுப்பி வைக்கப்பட்டனர்.

இதையடுத்து மாணவர்களை தாக்கியவர்கள் மீது நடவடிக்கை எடுக்கக்கோரி பொதுமக்கள் அங்குள்ள முப்புடாதி அம்மன்கோவில் முன்பு திரண்டனர். இதனால் அங்கு பெரும் பரபரப்பு ஏற்பட்டது. இதுகுறித்து தகவல் அறிந்த பாவூர்சத்திரம் போலீசார் விரைந்து சென்று பேச்சுவார்த்தை நடத்தினர். மேலும் அங்கு அசம்பாவிதம் ஏதும் நடைபெறாமல் இருக்க ஏராளமான போலீசார் குவிக்கப்பட்டு உள்ளனர்.