அந்தியூர் கால்நடை சந்தையில் கொங்கு காளை மாடு ஜோடி ரூ.1¾ லட்சத்துக்கு விற்பனை

அந்தியூர்

அந்தியூர் கால்நடை சந்தையில் கொங்கு காளை மாடு ஜோடி ரூ.1¾ லட்சத்துக்கு விற்பனை ஆனது.

கால்நடை சந்தை

அந்தியூர் கால்நடை சந்தையில் மாடு விற்பனை நடைபெற்றது. இந்த சந்தைக்கு அந்தியூர், அத்தாணி, ஆப்பக்கூடல், கள்ளிப்பட்டி, ஈரோடு, மேட்டூர், கொளத்தூர், பண்ணவாடி, எடப்பாடி, தர்மபுரி உள்பட பல்வேறு பகுதிகளில் இருந்து ஏராளமான விவசாயிகள் தங்களுடைய மாடுகளை விற்பனைக்காக கொண்டு வந்திருந்தனர்.

நாட்டு பசு மாடு ஒன்று ரூ.20 ஆயிரம் முதல் ரூ.50 ஆயிரம் வரையும், எருமை மாடு ஒன்று ரூ.30 ஆயிரத்தில் இருந்து ரூ.75 ஆயிரம் வரையும், ஜெர்சி பசு மாடு ஒன்று ரூ.20 ஆயிரம் முதல் ரூ.40 ஆயிரம் வரையும், சிந்து பசு மாடு ஒன்று ரூ.25 ஆயிரம் முதல் ரூ.45 ஆயிரம் வரையும், கன்றுக்குட்டி ரூ.5 ஆயிரம் முதல் ரூ.15 ஆயிரம் வரையும் விற்பனை ஆனது.

ரூ.1¾ லட்சம்

கொங்கு காளை மாடு ஜோடி ரூ.1 லட்சம் முதல் ரூ.1 லட்சத்து 89 ஆயிரம் வரையும், காங்கேயம் காளை மாடு ஜோடி ரூ.80 ஆயிரத்தில் இருந்து ரூ.1 லட்சத்து 50 ஆயிரம் வரையும், பர்கூர் இன காளை மாடு ஜோடி ரூ.30 ஆயிரம் முதல் ரூ.60 ஆயிரம் வரையும் விற்பனை செய்யப்பட்டது.

ஈரோடு, திருப்பூர், கோவை, மேட்டுப்பாளையம் உள்பட பல்வேறு பகுதிகளில் இருந்து ஏராளமான வியாபாரிகள் இங்கு வந்து மாடுகளை விலைபேசி பிடித்து சென்றனர்.