பல்வேறு வழக்குகளில் தொடர்புடைய ரவுடி கைது செய்யப்பட்டார்

கிருஷ்ணகிரி:

கிருஷ்ணகிரி ஜக்கப்பன் நகரை சேர்ந்தவர் மஞ்சு என்கிற மஞ்சுநாத் (வயது 26). ரவுடியான இவர் மீது 6-க்கும் மேற்பட்ட வழக்குகள் கிருஷ்ணகிரி டவுன், தாலுகா, குருபரப்பள்ளி போலீஸ் நிலையங்களில் உள்ளன. கடந்த ஒரு ஆண்டாக தலைமறைவாக இருந்த மஞ்சுநாத்தை பிடிக்க போலீசார் தனிப்படை அமைத்தனர். இவர்கள் மஞ்சுநாத் யார் யாரிடம் தொடர்பில் உள்ளார்? என்ன திட்டம் போடுகிறார்? என ரகசியமாக கண்காணித்து வந்தனர். கடந்த சில மாதங்களுக்கு முன் போலீஸ் தன்னை நெருங்குவதை அறிந்த மஞ்சுநாத் தனக்கு நெருக்கமானவர்களை தவிர யார் கண்ணிலும் படாமல் இருந்து வந்தார்.

இந்த நிலையில் கிருஷ்ணகிரி அடுத்த மேல் சோமார்பேட்டைக்கு மஞ்சுநாத் வருவதாக போலீசாருக்கு ரகசிய தகவல் கிடைத்தது. இதையடுத்து மேல்சோமார்பேட்டையில் கிருஷ்ணகிரி தாலுகா போலீசார் கண்காணித்தனர். நேற்று மதியம் மேல்சோமார்பேட்டைக்கு வந்த மஞ்சுநாத்தை கிருஷ்ணகிரி தாலுகா போலீசார் மடக்கி பிடித்தனர். பின்னர் அவரிடம் விசாரணையில் அவர், கூட்டாளிகள் சேர்ந்து கிருஷ்ணகிரி பகுதிகளில் தொடர் கொள்ளையில் ஈடுபட முயன்று, கொள்ளைக்கு பின் வெளி மாநிலங்களுக்கு தப்ப முயன்றதும் தெரிந்தது. இதையடுத்து மஞ்சுநாத்தை போலீசார் கைது செய்து அவரிடம் தொடர்ந்து விசாரித்து வருகின்றனர்.