தாரமங்கலம் அருகேமுதியவர் கொலையில் வியாபாரி கைது

தாரமங்கலம்

தாரமங்கலம் அருகே கே.ஆர்.தோப்பூர் தம்பி டாக்டர் தெருவை சேர்ந்தவர் தனசேகர் (வயது 60). இவரது வீட்டில் வாடகைக்கு இருந்த இரும்பு வியாபாரி பாலு என்ற பாலசுப்பிரமணியம் (42) என்பவர் மதுபோதையில் தகராறு செய்து வந்ததாக தெரிகிறது.

இதனால் தனசேகர், பாலுவை வீட்டை காலி செய்யும்படி கூறி வந்துள்ளார். பாலுவும் வீட்டை காலி செய்யும் பணியில் ஈடுபட்டுள்ளார். அப்போது ஏற்பட்ட தகராறில் தனசேகர் கட்டையால் அடித்துக் கொலை செய்யப்பட்டார். தகவல் அறிந்த தாரமங்கலம் போலீசார் சம்பவ இடத்துக்கு வந்து விசாரணை நடத்தினர். பின்னர் தனசேகரை அடித்துக் கொலை செய்ததாக பாலுவை கைது செய்து ஓமலூர் கோர்ட்டில் ஆஜர்படுத்தி சேலம் சிறையில் அடைத்தனர்.