மேச்சேரி அருகேகணவன்- மனைவியை கட்டி போட்டு கொள்ளை முயற்சி3 பேர் கைது

மேச்சேரி

மேச்சேரி அருகே கணவன்- மனைவியை கட்டி போட்டு கொள்ளை முயற்சியில் ஈடுபட்ட 3 பேரை போலீசார் கைது செய்தனர்.

கணவன்- மனைவி

மேச்சேரி அருகே சந்திரமாள் கடை பஸ் நிறுத்தம் அருகில் வசித்து வருபவர் தங்கம். இவர் பாய் தறி உரிமையாளர். அவருடைய மனைவி சித்ரா. இவர்கள் இருவரும் நேற்று முன்தினம் இரவு வீட்டில் இருந்தனர். திடீரென திபுதிபுவென 6 பேர் கும்பல் வீட்டுக்குள் அதிரடியாக புகுந்தது. அவர்கள் தங்கத்தின் வாயில் துணியை திணித்ததுடன் அவரை ஒரு அறையில் அடைத்து வைத்தனர். அவருடைய மனைவி சித்ராவை நாற்காலியில் அமர வைத்து கட்டினர்.

வீட்டில் பணம் எங்கு உள்ளது என்று கேட்டனர். பின்னர் மாடிக்கு சென்று அங்கிருந்த பீரோவை கம்பியால் உடைத்தனர். இதற்கிடையே சித்ரா நைசாக அவர்களிடம் இருந்து தப்பி வீட்டின் பின்பக்க வாசலில் நின்று சத்தம் போட்டார். அக்கம் பக்கத்தில் இருந்தவர்கள் ஓடி வந்தனர். அதற்குள் 6 பேரும் வீட்டுக்கு வெளியே நின்ற லாரியில் ஏறி தப்பி சென்றனர்.

போலீசார் விசாரணை

இந்த சம்பவம் பற்றிய தகவல் மேச்சேரி போலீசாருக்கு தெரிவிக்கப்பட்டது. துணை போலீஸ் சூப்பிரண்டு மரியமுத்து, இன்ஸ்பெக்டர் சண்முகம் தலைமையிலான போலீசார் சம்பவ இடத்துக்கு விரைந்து வந்து பார்வையிட்டனர். கைரேகை நிபுணர்கள், மோப்பநாய் கொண்டு சம்பவ இடத்தில் விசாரணை நடத்தப்பட்டது.

இதற்கிடையே அந்த பகுதியில் உள்ள அனைத்து இடங்களிலும் வாகன தணிக்கை முடுக்கி விடப்பட்டது. கொள்ளை கும்பல் தப்பி சென்ற லாரியை போலீசார் மடக்கி பிடித்தனர்.

3 பேர் கைது

பின்னர் ஓமலூர் கோட்டை மேட்டுப்பட்டியை சேர்ந்த டிரைவர் ராமன் (வயது 57), சரவணன் (65), சென்னம்பட்டியை சேர்ந்த முருகன் (64) ஆகிய 3 பேரை போலீசார் கைது செய்தனர். அதாவது கொள்ளை முயற்சி நடந்த 6 மணி நேரத்தில் அந்த கும்பலை போலீசார் சுற்றி வளைத்து பிடித்ததாக போலீசார் தெரிவித்தனர்.

மேலும் 3 பேரை போலீசார் தேடி வருகின்றனர்.