முயல் வேட்டையாட நாட்டுத்துப்பாக்கி வைத்திருந்தவர் கைது

ஊத்தங்கரை:

ஊத்தங்கரை அடுத்த ஊமையனூர் பகுதியில் சிறப்பு சப்-இன்ஸ்பெக்டர் நடராஜ் மற்றும் போலீசார் ரோந்து பணியில் ஈடுபட்டனர். அப்போது அங்கு ஒருவர் போலீசாரை கண்டதும் தப்பி ஓடினார். ஆனால் போலீசார் அந்த நபரை மடக்கி பிடித்து போலீஸ் நிலையத்துக்கு அழைத்து வந்து விசாரணை நடத்தினர். விசாரணையில் அவர் கொட்டிக்குட்டை கிராமத்தை சேர்ந்த தீனா (வயது 23) என்பதும், அவர் நாட்டுத்துப்பாக்கியை பயன்படுத்தி இரவு நேரங்களில் முயல்களை வேட்டையாடி வந்ததும் தெரியவந்தது. இதையடுத்து அவர் வைத்திருந்த நாட்டுத்துப்பாக்கியை பறிமுதல் செய்த போலீசார் தீனாவை ஊத்தங்கரை கோர்ட்டில் ஆஜர்படுத்தி கிருஷ்ணகிரி கிளை சிறையில் அடைத்தனர்.