நல்லம்பள்ளி அருகேடேங்கர் லாரியில் பெட்ரோல் திருடிய டிரைவர், கிளீனர் கைது

நல்லம்பள்ளி:

நல்லம்பள்ளி அருகே சிவாடி கிராமத்தில் உள்ள பெட்ரோல் சேமிப்பு கிடங்கில் இருந்து பெட்ரோல் ஏற்றிக்கொண்டு ஒரு டேங்கர் லாரி வேலூருக்கு புறப்பட்டது. இந்த லாரி நல்லம்பள்ளி அருகே சேலம்- தர்மபுரி தேசிய நெடுஞ்சாலையில் உள்ள ஒரு தனியார் பெட்ரோல் பங்க் எதிரே நிறுத்தப்பட்டிருந்தது. அப்போது டேங்கர் லாரி டிரைவர் மற்றும் கிளீனர் இருவரும் டேங்கர் லாரியில் இருந்து பெட்ரோல் திருடியதாக தெரிகிறது. இதுகுறித்து தகவல் அறிந்து சம்பவ இடத்திற்கு வந்த டேங்கர் லாரி உரிமையாளர் லாரியை சிவாடியில் உள்ள பெட்ரோல் சேமிப்பு கிடங்கிற்கு கொண்டு சென்று பெட்ரோல் அளவை சரிபார்த்தார்.

அப்போது டேங்கர் லாரியில் சுமார் 15 லிட்டர் பெட்ரோல் திருடப்பட்டிருப்பது கண்டுபிடிக்கப்பட்டது. இதுகுறித்து டேங்கர் லாரி உரிமையாளர் செந்தில்குமார் அதியமான்கோட்டை போலீசில் புகார் கொடுத்தார். அதன்பேரில் போலீசார் வழக்குப்பதிவு செய்து டேங்கர் லாரியில் பெட்ரோல் திருடியதாக சேலம் மாவட்டம் தீவட்டிப்பட்டி நைனாகாடு பகுதியை சேர்ந்த டிரைவர் முருகன் (வயது 38), டேனிஷ்பேட்டை பாரதிபுரம் பகுதியை சேர்ந்த கிளீனர் பிரவீன்குமார் (20) ஆகிய 2 பேரை போலீசார் கைது செய்தனர். மேலும் அவர்களிடம் இருந்து 15 லிட்டர் பெட்ரோல் பறிமுதல் செய்யப்பட்டது.