பள்ளி மாணவர்கள் மீது மதுபாட்டிலால் தாக்குதல்

பழனி அருகே உள்ள கோரிக்கடவில் இருந்து பழனி நோக்கி தனியார் பஸ் ஒன்று நேற்று சென்று கொண்டு இருந்தது. அந்த பஸ்சில் பிளஸ்-2 படிக்கும் 2 மாணவர்கள் பயணம் செய்தனர். அந்த பஸ் கோரிக்கடவு பகுதியில் வந்தபோது, பஸ்சில் குடிபோதையில் இருந்த 25 வயது மதிக்கத்தக்க நபர், அந்த மாணவர்களிடம் தனக்கும் டிக்கெட் எடுக்கும்படி கூறியதாக தெரிகிறது. அதற்கு அந்த மாணவர்கள் மறுத்தனர். அதையடுத்து அந்த வாலிபர், மாணவர்களிடம் தகராறில் ஈடுபட்டார். பின்னர் திடீரென்று தான் வைத்திருந்த மதுபாட்டிலால் மாணவர்களை தாக்கினார். இதில் ஒரு மாணவருக்கு தலையிலும், மற்றொருவருக்கு கையிலும் காயங்கள் ஏற்பட்டது. இந்த சம்பவத்தை கண்டதும் பஸ்சில் இருந்த பயணிகள் அலறினர்.

இதற்கிடையே மாணவர்களை தாக்கிய வாலிபர் பஸ்சில் இருந்து இறங்கி தப்பி ஓடிவிட்டார். தகவலறிந்த கீரனூர் போலீசார் சம்பவ இடத்துக்கு வந்து காயமடைந்த மாணவர்களை மீட்டு பழனி அரசு ஆஸ்பத்திரியில் சிகிச்சைக்காக சேர்த்தனர். பின்னர் இந்த சம்பவம் குறித்து விசாரணை நடத்தி வருகின்றனர். மேலும் பள்ளி மாணவர்களை தாக்கிய போதை வாலிபரை வலைவீசி தேடி வருகின்றனர்.