பணகுடி படப்பிடிப்பில் வித்தியாசமான கெட்-அப்பில் நடிகர் ரஜினிகாந்த்

பணகுடி:

ஜெயிலர் திரைப்படத்தின் வெற்றியை தொடர்ந்து நடிகர் ரஜினிகாந்த் நடித்து வரும் படத்துக்கு தற்காலிகமாக 'தலைவர் 170' என்று பெயரிடப்பட்டு படப்பிடிப்பு நடந்து வருகிறது. கேரள மாநிலத்தில் முதல்கட்ட படப்பிடிப்பை நிறைவு செய்த குழுவினர், நெல்லை மாவட்டம் பணகுடியில் 2-வது கட்ட படப்பிடிப்பை நேற்று முன்தினம் தொடங்கினர். அங்குள்ள தள ஓடு தொழிற்சாலையில் அதிரடி சண்டைக்காட்சிகளை படமாக்கி வருகின்றனர்.

நேற்று 2-வது நாளான படப்படிப்புக்கு வித்தியாசமான கெட்-அப்பில் வந்த நடிகர் ரஜினிகாந்தை ரசிகர்கள் மகிழ்ச்சி ஆரவாரத்துடன் உற்சாகமாக வரவேற்றனர். படப்பிடிப்பு முடிந்த பின்னர் மாலையில் புறப்பட்ட நடிகர் ரஜினிகாந்த் காரில் நின்று உற்சாகமாக ரசிகர்களை நோக்கி கையசைத்தார். இதனால் ரசிகர்கள் மகிழ்ச்சி ஆரவாரம் செய்தனர்.