அதிக அழுத்தம் காரணமாக தொழிற்சாலை பாய்லரில் விபத்து

விருதுநகர் அருகே அழகாபுரி ரோட்டில் உள்ள சிட்கோ தொழில்பேட்டையில் ஸ்ரீவில்லிபுத்தூர் வெங்கடேசபிரபு என்பவருக்கு சொந்தமான தொழிற்சாலை உள்ளது. இங்கு பழைய டயர்களை எரித்துகூழாக்கி சாலை போடும் ஆயில் தயாரிக்கும் பணி நடைபெறுகிறது. நேற்று மதியம் பணி நடைபெற்றுக் கொண்டிருந்த போது அழுத்தம் அதிகமானதால் பாய்லரில் உள்ள மூடி தூக்கி எறியப்பட்டு அருகில் இருந்த சுவற்றில் மோதி சுவரில் பெரிய ஓட்டை விழுந்தது. இதுபற்றி விருதுநகர் தீயணைப்பு படையினருக்கு தகவல் தெரிவிக்கப்பட்டது. தீயணைப்பு படை நிலைய அலுவலர் கண்ணன் தலைமையில் தீயணைப்பு படையினர் தொழிற்சாலைக்கு விரைந்தனர். ஆனால் அங்கு பணியின் போது யாரும் இல்லாததால் யாருக்கும் காயம் ஏற்படவில்லை. வேறு எந்த அசம்பாவிதமும் நிகழவில்லை. எனினும் தீயணைப்பு படை அலுவலர் கண்ணன் உரிய முன்னெச்சரிக்கை நடவடிக்கையோடு பணியை மேற்கொள்ளுமாறு ஆலை ஊழியர்களுக்கு அறிவுறுத்தினார்.