திம்பம் மலைப்பாதையில் லாரி-வேன் மோதல்; போக்குவரத்து பாதிப்பு

தாளவாடி

தாளவாடியில் இருந்து சத்தியமங்கலத்தில் உள்ள தனியார் சர்க்கரை ஆலைக்கு கரும்பு பாரம் ஏற்றிக்கொண்டு ஒரு லாரி நேற்று காலை 8 மணி அளவில் வந்துகொண்டு இருந்தது. திம்பம் மலைப்பாதையின் 20-வது கொண்டை ஊசி வளைவில் லாரி திரும்பியபோது ஈரோட்டில் இருந்து மைசூருக்கு செல்லும் வேன் எதிரே வந்தது. கண்இமைக்கும் நேரத்தில் லாரியும், வேனும் மோதிக்கொண்டன.

இந்த விபத்தில் வேனின் முன்பகுதி நொறுங்கி சேதம் ஆனாது. லாரி டிரைவரும், வேன் டிரைவரும் ஒருவருக்கொருவர் வாக்குவாதத்தில் ஈடுபட்டார்கள். இதனால் அங்கு சுமார் 1 மணி நேரம் போக்குவரத்து பாதிக்கப்பட்டது. இதுபற்றி தகவல் அறிந்ததும் ஆசனூர் போலீசார் சம்பவ இடத்துக்கு சென்று விபத்துக்குள்ளான வாகனத்தை அப்புறப்படுத்தி போக்குவரத்தை சீர்செய்தார்கள்.