பாமாயில் ஏற்றி சென்ற லாரி சாலையில் கவிழ்ந்தது

நாங்குநேரி:

தூத்துக்குடி துறைமுகத்தில் இருந்து 19 டன் பாமாயில் எண்ணெய் ஏற்றிக் கொண்டு ஒரு லாரி திருவனந்தபுரம் நோக்கி சென்று கொண்டிருந்தது.

நாங்குநேரி அருகே மூன்றடைப்பு போலீஸ் நிலையம் எதிரே உள்ள நான்கு வழிச்சாலையில் வரும்போது திடீரென டிரைவரின் கட்டுப்பாட்டை இழந்த லாரி சாலையோரம் இருந்த தடுப்பு கம்பிகள் மீது மோதி கவிழ்ந்தது.

இதில் அதிர்ஷ்டவசமாக டிரைவர் காயமின்றி உயிர் தப்பினார். இதில் லாரி பலத்த சேதம் அடைந்தது. தகவல் அறிந்ததும் நாங்குநேரி தீயணைப்பு படையினர் மீட்பு பணியில் ஈடுபட்டனர். இந்த விபத்து குறித்து மூன்றடைப்பு போலீசார் விசாரணை நடத்தினர்.