சென்னை புறநகர் பகுதிகளில் கொட்டி தீர்த்த மழையால் ஏரிகளுக்கு 75 கனஅடி நீர் வருகை - நீர்வளத்துறை அதிகாரிகள் தகவல்

சென்னை புறநகர் பகுதியில் ஏரிகளின் நீர்ப்பிடிப்பு பகுதிகளில் நேற்று முன்தினம் இரவு கொட்டி தீர்த்த மழையால் ஏரிகளுக்கு நீர் வரத்து அதிகரித்து உள்ளது. குறிப்பாக பூண்டி ஏரியின் நீர்ப்பிடிப்பு பகுதிகளில் 6 மில்லி மீட்டர் அளவில் மழை பெய்துள்ளது.

இதேபோல், சோழவரத்தில் 6, புழலில் 8, கண்ணன்கோட்டை-தேர்வாய் கண்டிகையில் 12, செம்பரம்பாக்கத்தில் 3, தாமரைப்பாக்கத்தில் 10, கொரட்டூர் அணைக்கட்டு பகுதியில் 3 மற்றும் நுங்கம்பாக்கத்தில் 6.9, மீனம்பாக்கத்தில் 7.6 மில்லிமீட்டர் என்ற அளவில் மழை பதிவாகி உள்ளது. இதனால் 75 கன அடி நீர் ஏரிகளுக்கு வந்து உள்ளது.

குறிப்பாக சென்னை மாநகர் மற்றும் புறநகர் பகுதிகளுக்கு குடிநீர் வழங்கும் ஏரிகளில் 3 ஆயிரத்து 291 மில்லியன் கன அடி கொள்ளளவு கொண்ட பூண்டி ஏரியில் 605 மில்லியன் கன அடியும், 1,081 மில்லியன் கன அடி கொள்ளளவு கொண்ட சோழவரம் ஏரியில் 138 மில்லியன் கன அடியும், 3 ஆயிரத்து 300 மில்லியன் கன அடி கொள்ளளவு கொண்ட புழல் ஏரியில் 2 ஆயிரத்து 655 மில்லியன் கன அடியும், 500 மில்லியன் கன அடி கொள்ளளவு கொண்ட கண்ணன்கோட்டை-தேர்வாய்கண்டிகை ஏரியின் முழு கொள்ளளவான 500 மில்லியன் கன அடியை எட்டி நிரம்பி உள்ளது.

அதேபோல் 3 ஆயிரத்து 645 மில்லியன் கன அடி கொள்ளளவு கொண்ட செம்பரம்பாக்கம் ஏரியில் 2 ஆயிரத்து 845 மில்லியன் கன அடியும் நீர் இருப்பு உள்ளது. இதுதவிர 1,465 மில்லியன் கன அடி கொள்ளளவு கொண்ட வீராணம் ஏரியில் 1,246 மில்லியன் கன அடி நீர் நிரம்பி உள்ளது. இதன் மூலம் 7 ஆயிரத்து 989 மில்லியன் கன அடி (7.9 டி.எம்.சி.) இருப்பு உள்ளது.

மேற்கண்ட தகவல்களை நீர்வள ஆதாரத்துறை மற்றும் சென்னை குடிநீர் வாரிய அதிகாரிகள் தெரிவித்தனர்.