காரில் கடத்திய 400 லிட்டர் சாராயம் பறிமுதல்

சிக்கல்:

கீழ்வேளூர் அருகே காரில் கடத்திய 400 லிட்டர் சாராயத்தை பறிமுதல் செய்த போலீசார் தப்பி ஓடிய 2 பேரை வலைவீசி தேடி வருகின்றனர்.

காரில் சாராயம் கடத்தல்

நாகை மாவட்டத்தில் பல்வேறு இடங்களில் காரைக்கால் பகுதியில் இருந்து சாராயம் கடத்தி வந்து விற்பனை செய்வதை தடுக்கும் வகையில் போலீசார் வாகன சோதனை மற்றும் ரோந்து பணியில் ஈடுபட்டு வருகின்றனர்.

இந்தநிலையில் நேற்று அதிகாலை கீழ்வேளூர் போலீஸ் சப்- இன்ஸ்பெக்டர் அக்பர் அலி தலைமயில் போலீசார், திருவாரூர் - நாகை தேசிய நெடுஞ்சாலையில் ஆழியூர் பிரிவு சாலை பகுதியில் வாகன சோதனை மேற்கொண்டனர்.

அப்போது காரைக்கால் வாஞ்சூர் பகுதியில் இருந்து ஒரு காரை நிறுத்தி சோதனை செய்ய முயன்றனர். இதை பார்த்த அவர்கள் காரை நிறுத்தாமல் சென்றனர்.

2 பேருக்கு வலைவீச்சு

உடனே போலீசார் தங்களது மோட்டார் சைக்கிள்களில் காரை பின் தொடர்ந்து சுமார் 15 கிலோ மீட்டர் தூரம் விரட்டி சென்று, வேளாங்கண்ணி கிழக்கு கடற்கரை சாலையில் காரை மடக்கி பிடித்தனர். அப்போது காரில் இருந்த 2 பேரும் அங்கிருந்து தப்பி ஓடிவிட்டனர்.

தொடர்ந்து போலீசார் அந்த காரை சோதனை செய்த போது அதில் 400 லிட்டர் சாராயம் காரைக்கால் வாஞ்சூர் பகுதியில் இருந்து கடத்தி வந்தது தெரிய வந்தது. இதுகுறித்து வழக்குப்பதிவு செய்த போலீசார் 400 லிட்டர் சாராயம் மற்றும் காரை பறிமுதல் செய்து, தப்பி ஓடிய 2 பேரையும் வலைவீசி தேடி வருகின்றனர்.