வெவ்வேறு விபத்துகளில் 4 பேர் படுகாயம்

சிவகாசி,

சிவகாசி எழில்நகரை சேர்ந்தவர் வைரமுத்து (வயது 26). இவர் சம்பவத்தன்று தனது குடும்பத்துடன் காரில் இருக்கன்குடி சென்றார். பின்னர் சாத்தூர்-இருக்கன்குடி ரோட்டில் வந்து கொண்டிருந்தபோது அந்த வழியாக இருசக்கர வாகனத்தில் வந்த மீனம்பட்டி வடக்கூரை சேர்ந்த காளிமுத்து (22) என்பவர் கார் மீது மோதியதாக கூறப்படுகிறது. இதில் காளிமுத்துவுக்கு காலில் எலும்பு முறிவு ஏற்பட்டது. இந்த விபத்து குறித்து சிவகாசி கிழக்கு போலீசார் வழக்குப்பதிவு செய்து விசாரணை நடத்தி வருகிறார்கள். இதேபோல் தென்காசி மாவட்டம் குற்றாலத்தை சேர்ந்தவர் பழனி (35). இவர் சாத்தூர் அருகே உள்ள சூரங்குடியில் தங்கி இருந்து கட்டிட வேலை செய்து வருகிறார். இந்த நிலையில் சம்பவத்தன்று இரவு சாத்தூர்-ஏழாயிரம்பண்ணை ரோட்டில் பழனி நடந்து சென்று கொண்டிருந்தார். அப்போது அந்த வழியாக மோட்டார் சைக்கிளில் வந்த ஒத்தையால் பகுதியை சேர்ந்த கணேஷ்குமார் என்பவர் பழனி மீது மோதியதாக கூறப்படுகிறது. இதில் பலத்த காயம் அடைந்த பழனியை அருகில் இருந்தவர்கள் மீட்டு நெல்லைக்கு சிகிச்சைக்காக அனுப்பி வைத்தனர். இந்த விபத்து குறித்து சாத்தூர் தாலுகா போலீசார் வழக்குப்பதிவு செய்து விசாரணை நடத்தி வருகிறார்கள். இதேபோல் சாத்தூர் அருகே உள்ள நத்தத்துப்பட்டி கிராமத்தை சேர்ந்த மாரிசெல்வம் (26). கட்டிட ெதாழிலாளி. சம்பவத்தன்று தன்னுடன் வேலை செய்து வரும் சரவணமுருகன் என்பவரை தனது மோட்டார் சைக்கிளில் அழைத்துக்கொண்டு வந்தார். அப்போது சாத்தூர்- இருக்கன்குடி ரோட்டில் செல்லும் போது அந்த வழியாக மோட்டார் சைக்கிளில் வந்த விஷ்ணு என்பவர் மாரிசெல்வத்தின் மோட்டார் சைக்கிள் மீது மோதினார். இதில் மாரிசெல்வம், விஷ்ணு 2 பேருக்கும் காயம் ஏற்பட்டது. இந்த விபத்து குறித்து அம்மாபட்டி போலீசார் வழக்குபதிவு செய்து விசாரணை நடத்தி வருகிறார்கள்.