3 நாட்கள் மழை பெய்ய வாய்ப்பு

மழைக்கு வாய்ப்பு

நாமக்கல் மாவட்டத்தில் இன்று (புதன்கிழமை) முதல் 3 நாட்கள் நிலவும் வானிலை குறித்து கால்நடை மருத்துவ கல்லூரி மற்றும் ஆராய்ச்சி நிலையம் சார்பில் வெளியிடப்பட்டு உள்ள செய்திக்குறிப்பில் கூறியிருப்பதாவது:-

அடுத்த 3 நாட்கள் வானம் பொதுவாக மேகமூட்டத்துடன் காணப்படும். இன்றும், நாளை மறுநாளும் (வெள்ளிக்கிழமை) 8 மி.மீட்டரும், நாளை (வியாழக்கிழமை) 6 மி.மீட்டரும் மழை பெய்ய வாய்ப்பு உள்ளது. வெப்ப நிலையை பொறுத்த வரையில் அதிகபட்சமாக 93.2 டிகிரியாகவும், குறைந்தபட்சமாக 75.2 டிகிரியாகவும் இருக்கும்.

காற்று மணிக்கு 10 கி.மீ.வேகத்தில் தென்மேற்கு திசையில் இருந்து வீசும். காற்றின் ஈரப்பதம் குறைந்தபட்சமாக 60 சதவீதமாகவும், அதிகபட்சமாக 70 சதவீதமாகவும்இருக்கும்.

நச்சு ஏற்பட வாய்ப்பு

சிறப்பு வானிலையை பொறுத்த வரையில் வைக்கோல் மற்றும் பசுந்தீவனங்களான நேப்பியர் ஒட்டு புல், கம்பு, கொளுக்கட்டை, கினியா புல் மற்றும் சிறுதானிய பயிர்களில் ஆக்சலேட் அளவு அதிகமாக காணப்படுகிறது. பொதுவாக இளம் வளரும் தீவன பயிர்களில் ஆக்சலேட் அளவு அதிகம் காணப்படும்.

அசைபோடும் விலங்குகளின் தீவனத்தில் 2 சதவீதத்திற்கு மேல் கரையும் ஆக்சலேட் அளவு இருப்பின் நச்சு ஏற்பட வாய்ப்புகள்அதிகம். அதேபோல் அசை போடாத விலங்குகளான குதிரை மற்றும் முயல்களில் 0.5 சதவீதத்திற்கு அதிகமாக கரையும். எனவே சூப்பர் நேப்பியர் மற்றும் கம்பு போன்ற தீவன பயிர்களை 45 நாள் இடைவெளியில் அறுவடை செய்ய வேண்டும். இளம் வளரும் தீவனப்பயிர்களை அதிக அளவு கால்நடைகளுக்கு கொடுக்கக்கூடாது. இவ்வாறு அதில் கூறப்பட்டு உள்ளது.