தமிழ்நாடு மற்றும் புதுச்சேரி பார் கவுன்சில் தலைவராக பி.எஸ்.அமல்ராஜ் தேர்வு

சென்னை,

தமிழ்நாடு மற்றும் புதுச்சேரி பார் கவுன்சிலுக்கு 25 உறுப்பினர்களை தேர்வு செய்வதற்கான தேர்தல் கடந்த 2018-ம் ஆண்டு மார்ச் 28-ந் தேதி நடந்தது. இந்த தேர்தலில் மொத்தம் 198 வழக்கறிஞர்கள் போட்டியிட்டனர். இந்த தேர்தலில் போட்டியிட்ட பி.எஸ்.அமல்ராஜ், ஆர்.சி.பால்கனகராஜ், எஸ்.பிரபாகரன், ஆர்.விடுதலை, கே.பாலு, ஜி.மோகனகிருஷ்ணன், வி.கார்த்திகேயன் உள்பட 25 பேர் உறுப்பினர்களாக தேர்ந்தெடுக்கப்பட்டனர்.

இவர்களில் இருந்து தமிழ்நாடு மற்றும் புதுச்சேரி பார் கவுன்சில் தலைவர், துணைத்தலைவர், அகில இந்திய பார் கவுன்சில் உறுப்பினர் ஆகிய பதவிகளுக்கான தேர்தல் நேற்று நடந்தது. உத்தரகாண்ட் ஐகோர்ட்டு ஓய்வு பெற்ற நீதிபதி பி.சி.காண்ட்பால் தேர்தல் பார்வையாளராக செயல்பட்டார். இந்த தேர்தலில் 25 உறுப்பினர்கள் மற்றும் அட்வகேட் ஜெனரல் ஆகியோர் ஓட்டு போட்டனர். இதில், பார் கவுன்சில் தலைவராக பி.எஸ்.அமல்ராஜ் அதிக ஓட்டுகள் பெற்று வெற்றி பெற்றார்.

துணைத்தலைவராக வி.கார்த்திகேயனும், அகில இந்திய பார் கவுன்சில் உறுப்பினராக எஸ்.பிரபாகரனும் வெற்றி பெற்றனர். இந்த தேர்தலில் வெற்றி பெற்றவர்கள் குறித்து அகில இந்திய பார் கவுன்சிலுக்கு அனுப்பி வைக்கப்படும். அங்கிருந்து முறைப்படி அறிவிப்பு வந்தபிறகு அரசிதழில் வெளியிடப்பட்டு, அதன்பிறகு புதிதாக தேர்ந்தெடுக்கப்பட்டவர்கள் பார் கவுன்சில் நிர்வாகிகளாக பொறுப்பேற்பார்கள் என்று பார் கவுன்சில் செயலாளர் ராஜகுமார் கூறினார்.