சாராயம் கடத்திய 2 பேர் கைது

சாராயம் கடத்திய 2 பேர் கைது செய்யப்பட்டனர்.

வேலூர் மதுவிலக்கு அமலாக்கப்பிரிவு போலீஸ் இன்ஸ்பெக்டர் செந்தில்குமார் தலைமையிலான போலீசார் அல்லேரி மலைப்பகுதியில் சாராய வேட்டை நடத்தினர். அப்போது மலையடிவாரத்தில் மோட்டார்சைக்கிளில் ஒருவர் சந்தேகப்படும்படியாக சென்றார்.

அவரை மடக்கி சோதனை செய்தபோது அவர் லாரி டியூப்களில் சாராயத்தை விற்பனைக்காக கடத்தி சென்றது தெரியவந்தது. விசாரணையில் அவர் அத்திமரக்கொல்லையை சேர்ந்த விஜி (வயது 27) என்பது தெரியவந்தது. இதையடுத்து அவரிடம் இருந்து 60 லிட்டர் சாராயம், மோட்டார்சைக்கிளை பறிமுதல் செய்து அழித்தனர். மேலும் சாராயம் விற்றதாக அதே பகுதியை சேர்ந்த ராமராஜ் (21) என்பவரையும் போலீசார் கைது செய்து, 60 லிட்டர் சாராயத்தை அழித்தனர்.