இரும்பு கம்பிகளை திருட முயன்ற 2 பேர் கைது

திருச்சி மாவட்டம் மண்ணச்சநல்லூரை சேர்ந்தவர் பிரகாசம் (வயது 45). இவர் தனியார் சிமெண்டு நிறுவனத்தில் மேற்பார்வையாளராக பணியாற்றி வருகிறார். இந்தநிலையில் அரியலூர் மாவட்டம் கீழப்பழுவூர் அருகே உள்ள பனங்கூரில் பிரகாசம் கட்டுப்பாட்டில் எடை மேடை இரும்பு கம்பிகள் மற்றும் சிறிய கூடாரம் உள்ளது. இந்நிலையில் சுள்ளங்குடி கிராமத்தை சேர்ந்த பூமணி (23), ஏலாக்குறிச்சி கிராமத்தை சேர்ந்த பிரதீப் (22) ஆகியோர் அந்த எடை மேடை இரும்பு கம்பிகளை திருட முயற்சித்துள்ளனர். அப்போது அங்கு இருந்தவர்கள் அவர்கள் 2 பேரையும் கையும் களவுமாக பிடித்து கீழப்பழுவூர் போலீசாரிடம் ஒப்படைத்தனர். இதுகுறித்து வழக்குப்பதிவு செய்த போலீசார் 2 பேரையும் கைது செய்து அரியலூர் கோர்ட்டில் ஆஜர்படுத்தி சிறையில் அடைத்தனர்.