மோட்டார் சைக்கிள் திருடிய 2 பேர் கைது

விருதுநகர் மாவட்டம் வடமலாபுரம், பாவனக்குறிச்சியை சேர்ந்தவர் சங்கிலி கருப்பசாமி (வயது 36). இவர் நெல்லை மாவட்டம் சீதபற்பநல்லூர் பகுதியில் கட்டிட வேலை நடைபெறுவதால் அங்கு தங்கி மேற்பார்வையாளராக வேலை பார்த்து வருகிறார். சங்கிலி கருப்பசாமி தங்கியிருக்கும் இடத்தில் தனது மோட்டார் சைக்கிளை நிறுத்தி வைத்திருந்தார். அதனை மர்ம நபர்கள் திருடி சென்று விட்டனர்.

இதுகுறித்து சீதபற்பநல்லூர் போலீஸ் சப்-இன்ஸ்பெக்டர் முகைதீன் மீரான் வழக்குப்பதிவு செய்து, மர்மநபர்களை தேடி வந்தார். இதில் தெற்கு சங்கன்திரடு நடுத்தெருவை சேர்ந்த சிவ மாயாண்டி (20), வனராஜா என்ற பேச்சிக்குட்டி (20) ஆகியோர் மோட்டார் சைக்கிளை திருடி சென்றது தெரியவந்தது. இதையடுத்து 2 பேரையும் கைது செய்த போலீசார் அவர்களிடமிருந்து மோட்டார் சைக்கிளையும் மீட்டனர்.