போலீஸ் சப்-இன்ஸ்பெக்டரை வெட்ட முயன்ற 2 பேர் கைது

பாளையங்கோட்டை தாலுகா போலீஸ் சப்-இன்ஸ்பெக்டர் நாஞ்சில் பிரித்திவிராஜ் தலைமையில் போலீசார் நேற்று மேலப்பாட்டம் பஸ்நிறுத்தம் பகுதியில் வாகன சோதனை நடத்தினார்கள். அப்போது அந்த வழியாக மோட்டார் சைக்கிளில் 2 பேர் வந்தனர். அவர்கள் வாகனத்தை நிறுத்தாமல் வேகமாக சென்றதால் போலீசார் சுற்றி வளைத்து தடுத்து நிறுத்தினார்கள். அப்போது மோட்டார் சைக்கிளில் பின்னால் இருந்தவர் அரிவாளை எடுத்து சப்-இன்ஸ்பெக்டர் நாஞ்சில் பிரித்விராஜ் வெட்ட முயன்றார். சுதாரித்து கொண்ட சப்-இன்ஸ்பெக்டர் மற்றும் போலீசார் அவர்கள் இருவரையும் மடக்கி பிடித்தனர்.

அவர்கள் திருமலைக்கொழுந்துபுரத்தை சேர்ந்த சுப்பிரமணியன் மகன் ஆறுமுகம் (வயது 26) மற்றும் சீவலப்பேரியை சேர்ந்த முருகன் என்ற குண்டு முருகன் (30) ஆகியோர் என்பது தெரிய வந்தது. இதுதொடர்பாக பாளையங்கோட்டை தாலுகா போலீசார் வழக்குப்பதிவு செய்து 2 பேரையும் கைது செய்தனர்.