தொழிலாளியிடம் பணம் பறித்த 2 பேர் கைது

பொள்ளாச்சி,

பொள்ளாச்சி அருகே உள்ள ரங்கசமுத்திரம் கருப்பராயன் கோவில் வீதியைச் சேர்ந்தவர் எபினேசன். இவர் தனியார் பஞ்சு மில்லில் வேலை செய்து வருகிறார். வேலை முடிந்ததும் தனது நண்பரின் இருசக்கர வாகனத்தில் வஞ்சியாபுரம் பிரிவு-பாலமநல்லூர் சாலையில் சென்று கொண்டிருந்தனர். அப்போது அங்கு வந்த மர்ம நபர்கள், அவரை தாக்கி ரூ.2,500-ஐ பறித்து சென்றனர். இதுகுறித்து பொள்ளாச்சி நகர கிழக்கு போலீஸ் நிலையத்தில் புகார் கொடுக்கப்பட்டது. புகாரின் பேரில் போலீசார் விசாரணை நடத்தினார்கள். விசாரணையில் மாக்கினம்பட்டி நேரு நகரை சேர்ந்த நாகராஜ் (வயது 22), சிவக்குமார் (21) ஆகியோர் பணத்தை பறித்தது தெரியவந்தது.

இதுகுறித்து வழக்குப்பதிவு செய்து, 2 பேரையும் போலீசார் கைது செய்தனர். மேலும் இதில் தொடர்புடைய நபர்களை போலீசார் தேடி வருகின்றனர்.