நாமக்கல் மாவட்டத்தில் 2 மையங்களில் பிளஸ்-2 விடைத்தாள் திருத்தும் பணி ஜூன் 1-ந் தேதி தொடங்குகிறது

நாமக்கல்:

தமிழகம் முழுவதும் இந்தாண்டு பிளஸ்-2 தேர்வு கடந்த 5-ந் தேதி தொடங்கியது. பெரும்பாலான மாவட்டங்களில் கடந்த 23-ந் தேதி தேர்வு முடிந்த நிலையில், ஒரு சில மாவட்டங்களில் நாளையுடன் (சனிக்கிழமை) தேர்வு முடிவடைகிறது. இதையொட்டி வருகிற ஜூன் மாதம் 1-ந் தேதி முதல் பிளஸ்-2 விடைத்தாள்களை திருத்த பள்ளிக்கல்வித்துறை அதிகாரிகள் திட்டமிட்டு உள்ளனர்.

நாமக்கல் மாவட்டத்தில் ரெட்டிப்பட்டி பாரதி மேல்நிலைப்பள்ளி, காடச்சநல்லூர் எஸ்.பி.கே. பள்ளி என 2 மையங்களில் பிளஸ்-2 விடைத்தாள் திருத்தும் பணி நடைபெற உள்ளது. இதற்கான ஆயத்த பணிகளை பள்ளிக்கல்வித்துறை அதிகாரிகள் செய்து வருகின்றனர். இந்த பணியில் முதன்மை மதிப்பீட்டாளர்கள், உதவி மதிப்பீட்டாளர்கள், கூர்ந்தாய்வாளர்கள் என 500-க்கும் மேற்பட்ட முதுகலை ஆசிரியர்கள் ஈடுபட உள்ளனர். தினசரி சுமார் 20 ஆயிரம் பேப்பர்கள் வீதம் திருத்த ஏற்பாடு நடந்து வருவதாக பள்ளிக்கல்வித்துறை அதிகாரிகள் தெரிவித்தனர்.