நாகலிங்க மலர்கள்

நாகலிங்க மரங்கள் நீலகிரி மலைப் பகுதியில் ஆங்கிலேயர்களால் அறிமுகப்படுத்தப்பட்டது. மிதமான தட்பவெப்ப நிலையில் வளரும் தன்மை கொண்ட இந்த மரங்கள், நீலகிரி மாவட்டம் பர்லியாறு பகுதியில் அதிகம் காணப்படுகின்றன.

பல தாவரங்கள் கடல் கடந்து நம் மண்ணை வந்தடைந்துள்ளன. அவை நம்மிடையே பரவலானது மட்டுமில்லாமல், உள்ளூர் மக்களின் ஆதரவைப் பெற்று நமது கலாசாரத்தின் ஒரு பகுதியாகவும் மாறி விடுவது உண்டு. அவற்றில் ஒன்றுதான் இந்த நாகலிங்க மரமும்.

இதன் தாவரவியல் பெயர் கோரூபியா கினென்சிஸ். தென் அமெரிக்காவின் வெப்ப மண்டல பகுதிகள் மற்றும் மேற்கிந்தியத் தீவுகளை தாயகமாகக் கொண்ட இந்த மரம் லெசிதிடசாய் தாவரவியல் குடும்பத்தைச் சேர்ந்தது. 1755-ம் ஆண்டு பிரெஞ்சு தாவரவியல் அறிஞர் ழீன் பாப்டிஸ்ட் கிறிஸ்டோபர் இந்த மரத்துக்கு தாவரவியல் பெயரை சூட்டினார்.

ஆண்டு முழுவதும் பூக்கும் தன்மை கொண்டது. அடி மரத்தில் இருந்து நேரடியாக கிளைகள் பெருகிவிடாத மரம். சராசரியாக 35 மீட்டர் உயரம் வரை வளரும், இந்த மரத்தில் பூக்கள் கொத்துக்கொத்தாக பூக்கும். நீண்ட கிளைகள் போன்ற காம்புகளில் பூக்கள் பூப்பதால் மரமே பூக்கள் நிறைந்து காட்சியளிக்கும். ஒரு மரத்தில் ஒரு நாளில் அதிகபட்சமாக ஆயிரம் மலர்கள்கூட பூக்கலாம். பல நாடுகளில் அலங்காரத்துக்காக இம்மரம் வளர்க்கப்படுகிறது.

பாம்பு படமெடுப்பது போன்ற மலரின் தோற்றத்தால் இந்த மலர் புனிதமாக கருதப்படுகிறது. நாட்டின் பல சிவாலயங்களில் இந்த மரம் வளர்க்கப்பட்டிருக்கிறது. இலங்கை புத்த மத வழிபாட்டிலும் இந்த மலர் முக்கியமானதாக இருக்கிறது. ஆங்கிலத்தில் இந்த மரத்துக்கு கேனான் பால் ட்ரீ (பீரங்கி குண்டு மரம்) என்று பெயர். மலர்களின் நறுமணம் கவர்ந்தாலும், காய்கள் உருண்டு பெருத்தவை. மரத்துக்குக் கீழே நின்றால் எந்த நேரத்திலும் தலையில் விழுந்து பதம் பார்க்கும் அபாயம் உண்டு.

இந்த தாவரத்துக்கு பல்வேறு மருத்துவ குணங்கள் உள்ளதாக கருதப்படுகிறது. வலி நிவாரணம், உயர் ரத்தஅழுத்தம், கட்டிகளைக் குணப்படுத்த அமேசான் பகுதி மக்கள் இந்த தாவரத்தை பயன்படுத்தி வருவதாக கூறப்படுகிறது. பல் வலி, சரும நோய்கள், வயிற்று வலி, மலேரியாவை குணப்படுத்தவும் இந்த தாவரம் பயன்படுத்தப்படுவதாக தகவல்.