டிரைவரை கொன்று காரை திருடி சென்றவர் கைது- 2 பேர் தலைமறைவு

வசாய்,

டிரைவரை கொன்று காரை திருடி சென்ற கும்பலை சேர்ந்த ஒருவர் ஒடிசாவில் போலீசாரின் பிடியில் சிக்கினார். 2 பேர் தொடர்ந்து தலைமறைவாக உள்ளனர்.

போலீசில் புகார்

பால்கர் மாவட்டத்தை சேர்ந்தவர் ஆசிப் தோச்சி. கார் டிரைவரான இவர், கடந்த 12-ந்தேதி நாசிக் திரிம்பகேஸ்வரர் கோவிலுக்கு 3 பேரை சவாரிக்காக காரில் அழைத்து சென்றார். இதன் பின்னர் அவர் வீடு திரும்பவில்லை. இது பற்றி அவரது மனைவி போலீசில் புகார் அளித்தார்.

இந்த புகாரின்பேரில் போலீசார் விசாரணை நடத்தி வந்தனர். கடந்த 15-ந்தேதி நாசிக் மாவட்டம் அம்போலி வனப்பகுதியில் ஆசிப் தோச்சி பிணமாக கிடந்தார். மேலும் அவரது கார் காணாமல் போய் இருந்தது.

ஒருவர் சிக்கினார்

இது குறித்து போலீசார் நடத்திய விசாரணையில், டிரைவர் ஆசிப் தோச்சியை கொன்று காரை 3 பேர் சேர்ந்து திருடி சென்றது தெரியவந்தது. அவர்களை பிடிக்க போலீசார் நடத்திய விசாரணையில், சத்தீஸ்கர் மாநிலம் ராய்ப்பூர் பகுதியில் தப்பிச்சென்ற கும்பலை சேர்ந்த ஒருவர் காருடன் நடமாடி வருவது தெரியவந்தது. இதையடுத்து அங்கு சென்றபோது போலீசார் பிடியில் சிக்காமல் தப்பி விட்டார்.

இறுதியாக ஒடிசா மாநிலத்தில் காருடன் இருந்த நபரை பிடித்து கைது செய்தனர். அவருடன் தொடர்பில் இருந்த மற்ற 2 பேரை பிடிக்க போலீசார் தீவிர விசாரணை நடத்தி வருகின்றனர்.