அமராவதியில் கனமழைக்கு வீடு இடிந்து விழுந்து தாய், மகள் பலி

அமராவதி,

அமராவதி மாவட்டம் சந்தூர்பஜார் தாலுகா வப்காவ் கிராமத்தில் கடந்த சில தினங்களாக கனமழை பெய்து வந்தது. இதன் காரணமாக இன்று காலை 6 மணி அளவில் அங்கிருந்த வீடு ஒன்று திடீரென இடிந்து விழுந்தது. இதனால் வீட்டில் இருந்த 5 பேர் இடிபாடுகளில் சிக்கி கொண்டு உதவி கேட்டு சத்தம் போட்டனர். இது பற்றி அறிந்த அக்கம்பக்கத்தினர் இடிபாடுகளில் சிக்கி இருந்த தாய், மகள் உள்பட 5 பேரை மீட்கும் பணியில் ஈடுபட்டனர். தகவல் அறிந்த தீயணைப்பு படையினர் அங்கு சென்று போராடி 5 பேரையும் மீட்டு மாவட்ட ஆஸ்பத்திரிக்கு அனுப்பி வைத்தனர். அங்கு டாக்டர் நடத்திய பரிசோதனையில் 35 வயது தாய், அவரது 7 வயது மகள் உயிரிழந்தது தெரியவந்தது. மற்ற 3 பேருக்கு தீவிர சிகிச்சை அளிக்கப்பட்டு வருகிறது.

இது குறித்து போலீசார் வழக்கு பதிவு செய்து விசாரணை நடத்தி வருகின்றனர்.