ஒவைசி சகோதரருக்கு எச்சரிக்கை விடுத்த நவ்நீத் ராணா எம்.பி.-தேர்தல் பிரசாரத்தில் சர்ச்சை

ஐதராபாத்,

தமிழில் அம்பாசமுத்திரம் அம்பானி உள்பட ஏராளமான படங்களில் நடித்த நடிகை நவ்நீத் ராணா கடந்த 2019-ம் ஆண்டு தேர்தலில் மராட்டியத்தின் அமராவதி தொகுதியில் சுயேச்சையாக போட்டியிட்டு வெற்றி பெற்றார்.இந்த தேர்தலில் பா.ஜனதா சார்பில் அந்த தொகுதியில் களமிறங்கி உள்ளார். இவர் தெலுங்கானாவின் ஐதராபாத் தொகுதியில் போட்டியிடும் பா.ஜனதா வேட்பாளர் மாதவி லதாவை ஆதரித்து பிரசாரம் மேற்கொண்டார்.

அப்போது அந்த தொகுதியின் எம்.பி.யும், மஜ்லிஸ் கட்சி வேட்பாளருமான ஒவைசியை கடுமையாக தாக்கி பேசினார். குறிப்பாக ஒவைசியின் இளைய சகோதரர் அக்பருதீன் கடந்த 2013-ம் ஆண்டு பேசிய சர்ச்சை கருத்துக்கு பதிலடி கொடுத்து பேசினார்.

அப்போது அக்பருதீன், 'போலீசாரை வெறும் 15 நிமிடங்கள் மட்டும் அகற்றி விடுங்கள். நாட்டின் இந்து-முஸ்லிம் விகிதத்தை சமப்படுத்துகிறோம்' என்று பேசியிருந்தார். இதையடுத்து ஒவைசி சகோதரருக்கு எச்சரிக்கை விடுத்த நவ்நீத் ராணா பேசும்போது, 'உங்களுக்கு 15 நிமிடங்கள் தேவைப்படும். ஆனால் எங்களுக்கு வெறும் 15 வினாடிகள் போதும். போலீசாரை 15 வினாடிகளுக்கு அகற்றி வைத்தால், இருக்கும் இடம் தெரியாமல் உங்களை அழித்து விடுவோம்' என்று கூறினார்.அவரது இந்த பேச்சு பிரசார களத்தில் பெரும் சர்ச்சையை ஏற்படுத்தி இருக்கிறது.

நவ்நீத் ராணாவின் இந்த பேச்சு குறித்து ஒவைசி கூறுகையில், 'மனிதாபிமானம் எஞ்சியிருக்கிறதா? என நாங்களும் பார்க்க விரும்புகிறோம். யார் அஞ்சுவது? யார் உங்களை தடுக்கிறார்கள்? அனைத்தும் உங்களிடம்தான் இருக்கிறது. எங்கே வர வேண்டும் என்று சொல்லுங்கள், வருகிறோம்' என கூறினார்.