லீக்கான சிசிடிவி காட்சிகள்...! ஓட்டலுக்கு கடத்தி செல்லப்பட்ட சிறுமி போதை ஊசி மது கொடுத்து பாலியல் பலாத்காரம்

ஐதராபாத்

தெலுங்கானா மாநிலம் ஐதராபாத்தில் கடந்த செவ்வாய்க்கிழமை மாலை மருந்து வாங்குவதற்காக சிறுமி ஒருவர் அருகில் உள்ள மருந்து கடைக்கு சென்றிருக்கிறார். ஆனால் நீண்ட நேரம் ஆகியும் சிறுமி வராததால் கலக்கமடைந்த பெற்றோர் காவல் நிலையத்தில் புகார் அளித்தனர். இந்த புகாரைத் தொடர்ந்து போலீசார் தீவிர தேடுதல் வேட்டையில் ஈடுபட்டனர். இதனையடுத்து இரண்டு நாட்கள் கழித்து சிறுமி ஒரு குறிப்பிட்ட இடத்தில் உள்ளதாக கிடைத்த தகவலையடுத்து அங்கு சென்று சிறுமியை மீட்டனர்.

விசாரணையில் சிறுமி இரண்டு நாட்களாக கூட்டு பாலியல் வன்கொடுமைக்கு உள்ளாக்கப்பட்டதாக அவரது தாய் புகார் அளித்துள்ளார். சிறுமியை காரில் வந்த இருவர் கடத்தியதாகவும், பின்னர் ஊசி மூலம் போதை பொருளை கொடுத்து, மதுவையும் ஊற்றிக்கொடுத்து சிறுமியை இரண்டு நாட்கள் வைத்திருந்து பாலியல் வன்கொடுமை செய்ததாக தாய் காவல்துறையில் தெரிவித்துள்ளார். இதனையடுத்து காவல்துறையினர் விசாரணையை தீவிரப்படுத்தினர்.

இதில் சிறுமி அழைத்துச் செல்லப்பட்ட இடங்கள் அடையாளம் காணப்பட்டுள்ளன. ஒரு பிரபல ஓட்டலின் சிசிடிவி காட்சிகள் தற்போது வெளியாகியுள்ளன. அதில் சிறுமி இருப்பதும் அந்த இரண்டு குற்றம்சாட்டப்பட்ட நபர்கள் இருப்பதும் தெரிய வந்துள்ளது. இதனையடுத்து சம்பந்தப்பட்ட ஓட்டலில் இவர்கள் தங்கியிருந்த அறையில் தடயவியல் நிபுணர்கள் சோதனை மேற்கொண்டு மாதிரிகளை சேகரித்து ஆய்வுக்கு எடுத்துச் சென்றுள்ளனர்.

இதில் குற்றம்சாட்டப்பட்ட இருவரும் கைது செய்யப்பட்டுள்ளனர். இவர்கள் இருவர் மீதும் ஆள் கடத்தல், கூட்டு பாலியல் வன்கொடுமை, போக்சோ உள்ளிட்ட சட்டங்களின் கீழ் வழக்குப்பதிவு செய்யப்பட்டுள்ளது.

குற்றம்சாட்டப்பட்டவர்களில் நயீமத் (26), ரபீஷ் (20) ஆகியோரில், ரபீஷ் உயர்நிலை பள்ளிப்படிப்பை பாதியிலேயே நிறுத்தியவராவார். நயீமத் சவுதியில் ஆப்டிகல் கடை வைத்து நடத்தி வருகிறார். தடயவியல் நிபுணர்கள் மாதிரிகளை பரிசோதித்த பின்னரே பாலியல் வன்கொடுமை குறித்த குற்றச்சாட்டுகள் உறுதி செய்யப்படும் என்பது குறிப்பிடத்தக்கது.