'ஆந்திராவில் கடந்த 10 ஆண்டுகளில் எந்த முன்னேற்றமும் ஏற்படவில்லை' - மாநில காங்கிரஸ் தலைவர் ஒய்.எஸ்.சர்மிளா

அமராவதி,

ஆந்திர மாநில முதல்-மந்திரியும், ஒய்.எஸ்.ஆர். காங்கிரஸ் கட்சியின் தலைவருமான ஜெகன் மோகன் ரெட்டி. இவரது சகோதரி ஒய்.எஸ். சர்மிளா. இவர் ஒய்.எஸ்.ஆர். தெலுங்கானா கட்சியை தொடங்கி அதன் தலைவராக இருந்து வருகிறார்.

இவர் கடந்த 4-ந்தேதி தனது கட்சியை காங்கிரஸ் கட்சியுடன் இணைத்துக் கொண்டார். டெல்லி அலுவலகத்தில் காங்கிரஸ் தேசிய தலைவர் மல்லிகார்ஜுன கார்கே, மூத்த தலைவர் ராகுல் காந்தி முன்னிலையில் ஒய்.எஸ். சர்மிளா காங்கிரஸ் கட்சியில் இணைந்தார். இதைத் தொடர்ந்து ஆந்திர மாநில காங்கிரஸ் கட்சியின் புதிய தலைவராக ஒய்.எஸ்.சர்மிளா நியமிக்கப்பட்டார்.

இந்த நிலையில் ஆந்திர மாநிலம் விஜயவாடாவில், மாநில காங்கிரஸ் தலைவர் ஒய்.எஸ்.சர்மிளா செய்தியாளர்களை சந்தித்து பேசினார். அப்போது அவர் கூறியதாவது;

"காங்கிரஸ் கட்சியின் அனைத்து தலைவர்களும் என்னை நம்பியது பெருமைக்குரிய விஷயம். ஆந்திராவில் கடந்த 5 ஆண்டுகளாக ஒய்.எஸ்.ஆர். காங்கிரஸ் கட்சி ஆட்சியில் உள்ளது. அதற்கு முன், தெலுங்கு தேசம் கட்சி ஆட்சியில் இருந்தது. இந்த 10 ஆண்டுகளில் எந்த முன்னேற்றமும் இல்லை. தற்போது ஆந்திரா நிதிக்காக பாடுபடுகிறது.

சந்திரபாபு நாயுடு சரியான மூலதனத்தை உருவாக்கவில்லை. ஜெகன் மோகன் ரெட்டி மூன்று தலைநகரங்களை அறிவித்தார். ஆனால் அவரால் ஒரு தலைநகரை கூட உருவாக்க முடியவில்லை. ஆந்திராவில் குறைந்தபட்சம் ஒரு மெட்ரோ கூட கிடையாது.

முந்தைய மற்றும் தற்போதைய கடன்கள் அனைத்தையும் சேர்த்தால், ஆந்திர மாநிலத்தின் கடன் 10 லட்சம் கோடியாக உயர்ந்துள்ளது. கடந்த 10 ஆண்டுகளில் 10 புதிய, பெரிய தொழிற்சாலைகள் கூட வரவில்லை. வேலையில்லாத இளைஞர்களுக்கான வேலைவாய்ப்புகள் வழங்கப்படவில்லை. ஆனால் தலித்துகள் மீதான தாக்குதல்கள் 100 சதவீதம் அதிகரித்துள்ளன.

ஒய்.எஸ்.ஆர். காங்கிரஸ் கட்சியும், தெலுங்கு தேசம் கட்சியும் பா.ஜ.க.வுடன் ரகசிய கூட்டணி வைத்துள்ளன. அவர்களின் எம்.பி.க்கள் அனைவரும் பா.ஜ.க.வுக்கு தலை வணங்குகிறார்கள். மத்தியில் 10 ஆண்டுகளாக பா.ஜ.க. ஆட்சியில் உள்ளது. ஒவ்வொரு ஆண்டும் 2 கோடி வேலை வழங்குவதாக பா.ஜ.க. கூறியது.

ஆனால் ஆந்திராவில் பா.ஜ.க.வால் ஒரு லட்சம் வேலை வாய்ப்புகள் கூட கொடுக்க முடியவில்லை. தேசிய அளவில் பா.ஜ.க. விவசாயிகளை வஞ்சித்துள்ளது. நாட்டில் கடன் இல்லாத விவசாயி இல்லை. சுவிஸ் வங்கியில் பணத்தை திரும்பக் கொண்டு வந்து விவசாயிகளின் கணக்கில் முதலீடு செய்யுங்கள்."

இவ்வாறு ஒய்.எஸ்.சர்மிளா தெரிவித்தார்.