பள்ளி மாணவி கூட்டு பலாத்காரம்

உப்பள்ளி:-

தார்வார் மாவட்டம் உப்பள்ளி அருகே உள்ள கிராமத்தை சேர்ந்தவர் 15 வயது சிறுமி. இவள் உப்பள்ளியில் உள்ள பள்ளியில் படித்து வருகிறாள். இந்த நிலையில் மாணவிக்கும், உப்பள்ளியை சேர்ந்த வாலிபர் ஒருவருக்கும் பழக்கம் ஏற்பட்டது. இருவரும் பழகி வந்தனர். தனது தந்தையின் செல்போனில் இருந்து போன் செய்தும், குறுந்தகவல் அனுப்பியும் சிறுமி, அந்த வாலிபருடன் பேசி வந்தாள். இந்த நிலையில் நேற்று முன்தினம் செல்போன் வாங்கி தருவதாக கூறி சிறுமியை அந்த வாலிபர் உப்பள்ளிக்கு அழைத்துள்ளார். இதனை நம்பிய சிறுமியும், உப்பள்ளிக்கு சென்றுள்ளாள். பின்னர் அந்த வாலிபர், சிறுமியை மோட்டார் சைக்கிளில் அழைத்து கொண்டு உப்பள்ளியில் சுற்றி வந்துள்ளார்.

பின்னர் உப்பள்ளி ரிங்ரோடு பகுதியில் உள்ள பாலத்துக்கு அடியில் அழைத்து சென்றார். அங்கு வாலிபரின் நண்பர்கள் 3 பேர் இருந்தனர். பின்னர் அவர்கள் 4 பேரும் சேர்ந்து சிறுமியை மிரட்டி கூட்டு பலாத்காரம் செய்ததாக தெரிகிறது. இதுபற்றி வெளியே கூறினால் கொலை செய்துவிடுவதாக மிரட்டி அவர்கள் அங்கிருந்து தப்பி சென்றுவிட்டனர். இந்த சம்பவம் குறித்து சிறுமி, கோகுல்ரோடு போலீசில் புகார் அளித்தார். அதன்பேரில் போலீசார் போக்சோ சட்டத்தின் கீழ் வழக்குப்பதிவு செய்து 4 பேரையும் வலைவீசி தேடி வருகிறார்கள்.