மக்கள் தொகை பெருக்கத்தை தணிக்க வழிகாட்டுதல்களை உருவாக்க கோரிய மனு: மத்திய அரசுக்கு சுப்ரீம் கோர்ட்டு நோட்டீஸ்!

புதுடெல்லி,

மக்கள் தொகைப் பெருக்கம் குறித்து வழிகாட்டுதல்களை உருவாக்க மத்திய அரசுக்கு உத்தரவிடக் கோரி அகில பாரதிய சாந்த் சமிதியின் பொதுச் செயலாளர் தண்டி சுவாமி ஜீதேந்திரானந்த சரஸ்வதி மனு தாக்கல் செய்தார்.

இந்த மனு நீதிபதிகள் கே.எம்.ஜோசப் மற்றும் ஹிருஷிகேஷ் ராய் ஆகியோர் அடங்கிய அமர்வு முன்னிலையில் இன்று விசரணைக்கு வந்தது. அப்போது இந்த விவகாரத்தில் அரசிடம் பதில் கோரி மத்திய அரசுக்கு கோர்ட்டு நோட்டீஸ் அனுப்பியுள்ளது. இதேபோன்ற நிலுவையில் உள்ள பிற மனுக்களுடன் இந்த மனுவையும் கோர்ட்டு பட்டியலிட்டு வழக்கை ஒத்தி வைத்தது.

அந்த மனுவில் கூறப்பட்டிருப்பதாவது:-

ஒவ்வொரு ஆண்டும் மக்கள்தொகை அதிகரித்து வருகிறது. ஆனால் இயற்கை வளங்கள் குறைவாகவே உள்ளன. மேலும் அதிகரித்து வரும் மக்கள்தொகையைத் தக்க வைக்க முடியாது.

வேலையில்லாத் திண்டாட்டம், உணவு வழங்கல் வரம்பு, சுகாதாரப் பாதுகாப்பு வசதிகள் போன்றவை மற்றும் வறுமை கடுமையாக அதிகரிக்கும் போது அரசு வேறு வழியைப் பார்க்க முடியாது.மில்லியன் கணக்கான இந்திய குடிமக்களின் வாழ்க்கைத் தரத்தை மோசமாக பாதிக்கும் பல கடுமையான பிரச்சினைகளுக்கு வழிவகுக்கும் மிக முக்கியமான காரணிகளில் அதிக மக்கள்தொகை ஒன்றாகும்.

ஆகவே அதிக மக்கள்தொகைப் பிரச்சனையின் காரணமாக இந்தியாவின் மில்லியன் கணக்கான குடிமக்களின் அடிப்படை உரிமைகளைப் பாதுகாப்பதற்கான வழிகாட்டுதல்கள், மக்கள் தொகைப் பெருக்கத்தை திறம்படத் தணிக்க விதிகள், விதிமுறைகள் மற்றும் வழிகாட்டுதல்களை உருவாக்க மத்திய அரசுக்கு உத்தரவிட வேண்டும்.

மக்கள்தொகை அதிகரிப்பு குறித்த விழிப்புணர்வை ஏற்படுத்த, ஏழை குடும்பங்களுக்கு போலியோ தடுப்பூசிகளுடன் கருத்தடை மாத்திரைகள், ஆணுறைகள், தடுப்பூசிகள் போன்றவற்றை வழங்குவதற்காக ஒவ்வொரு மாதமும் முதல் ஞாயிற்றுக்கிழமையை 'சுகாதார தினமாக' அரசு அறிவிக்க வேண்டும்.

மக்கள் தொகைக் கட்டுப்பாட்டு நடவடிக்கைகள் குறித்த விரிவான அறிக்கையை மூன்று மாதங்களுக்குள் தயாரிக்குமாறு இந்திய சட்ட ஆணையத்திற்கு நீதிமன்றம் உத்தரவு பிறப்பிக்க வேண்டும்.

தற்போது, இந்தியாவின் மக்கள்தொகை 1.39 பில்லியனுக்கு அருகில் உள்ளது. இது உலக மக்கள் தொகையில் 17.8% ஆகும். ஆனால் உலகில் உள்ள நிலப்பரப்பில், இந்தியாவில் 2% விவசாய நிலமும், 4% குடிநீர் மட்டுமே உள்ளன. அமெரிக்காவில் தினமும் 10,000 குழந்தைகள் பிறக்கின்றன, ஆனால் இந்தியாவில் 70,000 குழந்தைகள் பிறக்கின்றன.

இவ்வாறு அந்த மனுவில் தெரிவிக்கப்பட்டது.

மனுதரர் தரப்பில் கூறுகையில், "மக்கள்தொகைப் பெருக்கத்தின் சிக்கலைத் தணிக்க, அரசியலமைப்பின் செயல்பாட்டை மறுபரிசீலனை செய்வதற்கான முன்மொழிவுகள் தேசிய ஆணையத்தின் மூலம் கொண்டுவரப்பட்டன. தேசிய ஆணையத்தின் முன்மொழிவுகளை அரசு உரிய முறையில் பரிசீலிக்காத வரையில் அடிப்படை உரிமைகள் என்பது சிக்கலாகவே இருக்கும்" என்றார்.