உல்லாசத்துக்கு அழைத்து வாலிபர்களை கும்பலுடன் சேர்ந்து கடத்திய விபசார அழகி

பேகூர்:

பெங்களூருவில் இருந்து வாலிபர்களை உல்லாசத்துக்கு அழைத்த விபசார அழகி அவர்களை பணத்துக்காக கும்பலுடன் சேர்ந்து மைசூருவுக்கு கடத்திச் சென்றார். அவர்களை போலீசார் மைசூரு வரை பின்தொடர்ந்து சென்று பிடித்து கைது செய்துள்ளனர்.

காருடன் கடத்தல்

பெங்களூருவை சேர்ந்தவர் மஞ்சுநாத். இவர் தனது நண்பர் ரஜினிகாந்த் என்பவருடன் காரில் வெளியே சென்றார். அப்போது அவர்கள் இளம்பெண் ஒருவரையும் தங்களுடன் காரில் அழைத்து சென்றனர். அந்த இளம்பெண் விபசார அழகி என்று கூறப்படுகிறது. ரஜினிகாந்த், மஞ்சுநாத் ஆகிய 2 பேரையும் அந்த விபசார அழகி உல்லாசத்து அழைத்துள்ளார். அதன்பேரில் அவர்கள் அந்த விபசார அழகியை பன்னரகட்டா சாலையில் உள்ள ஓட்டலுக்கு அழைத்து சென்றனர். அந்த சமயத்தில் அங்கு 4 மோட்டார் சைக்கிளில் வந்த மர்மநபர்கள் 7 பேர், காரை வழிமறித்தனர்.

பின்னர், காரை அடித்து உடைத்துவிடுவதாக கூறி பணம் கேட்டு மிரட்டி உள்ளனர். அப்போது வாலிபர்கள் பணம் இல்லை என கூறவும், காருடன் அவர்களை கடத்தி சென்றனர். அந்த சமயத்தில் அவர்களிடம் இருந்து மஞ்சுநாத் தப்பி சென்றார். மேலும் அவர் உடனடியாக பேகூர் போலீசாருக்கு தகவல் கொடுத்தார். தகவலின் பேரில் போலீசார் கடத்தல் காரை பின்தொடர்ந்து சென்றனர்.

விபசார அழகி

அப்போது அந்த கார் மைசூரு மாவட்டம் நஞ்சன்கூடுவில் இருப்பது தெரிந்தது. இதையடுத்து விரைவாக அங்கு சென்ற போலீசார், கடத்தலில் ஈடுபட்ட கும்பலை சுற்றி வளைத்து பிடித்தனர். இதையடுத்து அவர்களிடம் விசாரணை நடத்தினர். அப்போது பல திடுக்கிடும் தகவல்கள் வெளிவந்தன.

விசாரணையில் இளம்பெண்ணை, மஞ்சுநாத் மற்றும் ரஜினிகாந்த் கெங்கேரி பகுதியில் இருந்து அழைத்து வந்தது தெரிந்தது. மேலும், வாலிபர்களுடன் வந்த விபசார அழகிதான், மர்மகும்பலுக்கு தகவல் கொடுத்து சினிமா பட பாணியில் கொள்ளையில் ஈடுபட முயன்றதும் தெரிந்தது.

இதையடுத்து கடத்தல் சம்பவத்தை அரங்கேற்றியதாக இளம்பெண் உள்பட 8 பேரை போலீசார் கைது செய்தனர். அவர்கள் மீது வழக்குப்பதிவு செய்தனர். மேலும் இதுகுறித்து மஞ்சுநாத் மற்றும் ரஜினிகாந்திடமும் போலீசார் விசாரணை நடத்தி வருகின்றனர். இந்த கடத்தல் சம்பவம் தாமதமாக வெளிச்சத்திற்கு வந்துள்ளது.