சீனாவில் சுவாச நோய் பரவல் அதிகரிப்பு; இந்திய டாக்டர்கள் கூறுவது என்ன...?

புதுடெல்லி,

சீனாவில் பரவி வரும் சுவாச நோய் தொற்றால் குழந்தைகள் அதிக பாதிப்புகளை எதிர்கொண்டு வருகின்றனர். எச்9என்2 வகை வைரசின் பாதிப்புகளால், மருத்துவமனைகளில் சேர்க்கப்படும் குழந்தைகளின் எண்ணிக்கையும் அதிகரித்து உள்ளது அரசுக்கு சவாலை ஏற்படுத்தியிருக்கிறது. இதனால், அண்டை நாடான இந்தியாவில் இதன் பாதிப்புகள் என்ன வகையான தாக்கம் ஏற்படுத்தும்? என்பது பற்றி டாக்டர்கள் கூறும் விசயங்களை காண்போம்.

இதுபற்றி டெல்லி ராம் மனோகர் லோஹியா மருத்துவமனையின் இயக்குநரான, டாக்டர் அஜய் சுக்லா பேசும்போது, மக்கள் கவனத்துடன் இருக்க வேண்டும் என அறிவுறுத்துகிறேன்.

தூய்மையான பழக்க வழக்கங்களை சீராக கடைப்பிடியுங்கள். யாருக்காவது சுவாச பாதிப்பு அல்லது தொற்று ஏற்பட்டு உள்ளது என உணர்ந்தீர்கள் என்றால், மற்றவர்களிடம் இருந்து சற்று இடைவெளியை கடைப்பிடிக்கவும். ஏனெனில், இவை கடுமையான நச்சுத்தன்மை கொண்டதுடன், அதிகம் பரவும் தன்மையும் உடையது என கூறியுள்ளார்.

பாதுகாப்புக்காக முக கவசம் அணியும்படி வலியுறுத்திய சுக்லா, உங்களுடைய குழந்தைகளுக்கு இருமல், ஜலதோஷம், காய்ச்சல் அல்லது வேறு ஏதேனும் அறிகுறிகள் தென்பட்டால், அவர்களிடம் பேசுங்கள். பள்ளியில் வேறு யாருக்காவது பாதிப்பு இருக்கின்றதா? என்று தெரிந்து கொள்ளுங்கள்.

உங்களுடைய குழந்தைகளுக்கு பாதிப்பு காணப்பட்டால், பள்ளிக்கு அனுப்ப வேண்டாம் என்றும் அறிவுரை வழங்கியுள்ளார். சீனாவில் ஒரு சில மையங்களில், ஒரு நாளைக்கு 1,200 குழந்தைகள் என்ற விகிதத்தில் மருத்துவமனையில் சேரும் குழந்தைகளின் எண்ணிக்கை அதிகரித்து காணப்படுகிறது. இதனால் நிலைமை மோசமடைந்து உள்ளது என்றும் அவர் கூறுகிறார்.

கொரோனா பெருந்தொற்று தொடர்ச்சியாக விதிக்கப்பட்ட கடுமையான ஊரடங்கு உத்தரவால், மக்கள் மற்றும் குழந்தைகளிடம் எதிர்ப்பு சக்தியில் பாதிப்பு ஏற்பட்டு உள்ளது. இந்த குறைவான எதிர்ப்பு சக்தியால், இதுபோன்ற பாதிப்புகள் திரும்பவும் தோன்றியுள்ளன என்று மற்றொரு நிபுணர் கூறியுள்ளார்.