என்னை விட சிறந்த நட்சத்திர பேச்சாளர் இல்லை; பிரதாப் சிம்ஹா எம்.பி. சொல்கிறார்

குடகு:

குடகு மாவட்டம் சோமவார்ப்பேட்டையில் குடகு-மைசூரு எம்.பி. பிரதாப் சிம்ஹா நிருபர்களுக்கு பேட்டி அளித்தார். அப்போது அவர் கூறியதாவது:-

வருணா தொகுதியில் சித்தராமையாவுக்கு ஆதரவாக பிரசாரம் செய்ய டி.கே.சிவக்குமார், நடிகை ரம்யா, நடிகர் துனியா விஜய் ஆகியோர் வரட்டும். நானும் பிரசாரத்திற்கு செல்வேன். என்னை விட சிறந்த நட்சத்திர பேச்சாளர் யாரும் இல்லை. மல்லிகார்ஜுன கார்கே வருணா தொகுதிக்கு பிரசாரத்திற்கு வந்தாரா?. மல்லிகார்ஜுன கார்கேவை அரசியல் ரீதியாக முடிக்க சித்தராமையா தயாராகிவிட்டார். சித்தராமையா கடந்த 2013-ம் ஆண்டு தேர்தலில் கொரட்டகெரே தொகுதியில் பரமேஸ்வரை தோற்கடித்தார். சித்தராமையா ஒரு சாதி வெறியர். அதனால் அவரது தொகுதிக்கு கே.எச்.முனியப்பா, ஆஞ்சநேயா ஆகியோர் வரவில்லை. இதனால் அவர் திரைப்பட நடிகர், நடிகையை தேர்தல் பிரசாரத்திற்கு அழைத்து வர முடிவு செய்துள்ளார். வரட்டும் நானும் பிரசாரத்திற்கு செல்கிறேன். மக்கள் செல்வாக்கு யாருக்கு இருக்கிறது என்பது தெரியவரும்.

இவ்வாறு அவர் கூறினார்.