15 வயது சிறுமி ஆட்டோவில் கடத்தல்..! உள்ளூர்வாசிகள் துரத்தியதால் சிறுமியை தூக்கிவீசிவிட்டு தப்பியோட்டம்

பாட்னா,

பீகார் மாநிலம் கயா மாவட்டத்தில் உள்ள பர்தாரா பஜார் பகுதியில் ஆட்டோ ஒன்றில் வந்த இரு இளைஞர்கள், 15 வயது சிறுமியை தவறான நோக்கத்துடன் கடத்திச்செல்ல முற்பட்டனர்.

ஆட்டோவில் இருவர் தன்னை வலுக்கட்டாயமாக தூக்கிச்சென்றதால் அதிர்ச்சியடைந்த அச்சிறுமி, உடனடியாக கூச்சலிட்டார். சிறுமியின் அலறல் சத்தத்தை கேட்ட அக்கம்பக்கத்தினர், ஆட்டோவை துரத்திச்சென்றனர்.

உள்ளூர்வாசிகள் தங்களை துரத்துவதை அறிந்த அந்த இளைஞர்கள், ஆட்டோவில் இருந்து சிறுமியை வெளியே தூக்கி வீசிவிட்டு தப்பியோடினர். இதில் பலத்த காயம் அடைந்த சிறுமி மயங்கிய நிலையில் மருத்துவமனைக்கு கொண்டுசெல்லப்பட்டு சிகிச்சை அளிக்கப்பட்டது.

எனினும், உள்ளூர்வாசிகள் ஆட்டோ டிரைவரை பிடித்து போலீசில் ஒப்படைத்தனர். இதனை தொடர்ந்து ஆட்டோ டிரைவர் அளித்த தகவலின் அடிப்படையில் குற்றவாளிகளை போலீசார் தேடி வருகின்றனர். ஆட்கள் நடமாட்டமுள்ள பகுதியில் சிறுமி கடத்தப்பட்ட சம்பவம் அப்பகுதியில் பரபரப்பை ஏற்படுத்தியது.