கஞ்சா விற்ற 2 பேர் சிக்கினர்

உப்பள்ளி, ஜன.11-

தார்வார் மாவட்டம் உப்பள்ளி புறநகர் கசபா பகுதியில் கஞ்சா விற்பனை நடப்பதாக கசபா போலீசாருக்கு ரகசிய தகவல் கிடைத்தது. அந்த தகவலின் பேரில் போலீசார் சம்பந்தப்பட்ட இடத்தில் சோதனையில் ஈடுபட்டனர். அப்போது அந்த பகுதியில் கையில் பையுடன் சந்தேகத்திற்கு இடமான வகையில் வாலிபர்கள் 2 பேர் சுற்றித்திரிந்தனர். அவர்களை போலீசார் பிடித்து விசாரணை நடத்தினர். அப்போது அவர்கள் முன்னுக்கு பின் முரணாக பதில் அளித்தனர்.

இதையடுத்து அவர்களிடம் போலீசார் கிடுக்கிப்பிடி விசாரணை நடத்தினர். விசாரணையில் அவர்கள் கபூர் பகுதியை சேர்ந்த நதீப் (வயது 40), லோகேஷ் (38) என்பதும், அவர்கள் அந்த பகுதியில் நின்று கொண்டு கஞ்சா விற்பனை செய்து வந்ததும் தெரிந்தது. இதையடுத்து அவகள் 2 பேரையும் போலீசார் கைது செய்தனர். அவர்கள் மீது வழக்குப்பதிவு செய்த போலீசார் அரை கிலோ கஞ்சா, செல்போன் ஆகியவற்றை பறிமுதல் செய்தனர். இதுதொடர்பாக போலீசார் தொடர்ந்து விசாரணை நடத்தி வருகின்றனர்.