தொப்பூர் கணவாயில் மோட்டார் சைக்கிள்கள் மீது டேங்கர் லாரி மோதி வாலிபர் சாவு 2 பேர் படுகாயம்

நல்லம்பள்ளி:

தொப்பூர் கணவாயில் மோட்டார் சைக்கிள்கள் மீது டேங்கர் லாரி மோதி  வாலிபர் இறந்தார். மேலும் 2 பேர் படுகாயம் அடைந்தனர்.

கர்நாடக மாநிலத்தில் இருந்து நெல்லை மாவட்டத்திற்கு எத்தனால் ஏற்றிக்கொண்டு ஒரு டேங்கர் லாரி வந்து கொண்டு இருந்தது. தர்மபுரி மாவட்டம் தொப்பூர் கணவாய் முதல் வளைவை கடந்த போது டிரைவரின் கட்டுப்பாட்டை இழந்த லாரி, தாறுமாறாக ஓடி, முன்னால் சென்ற 2 மோட்டார் சைக்கிள்கள் மீது அடுத்தடுத்து மோதியது. பின்னர் அந்த டேங்கர் லாரி சாலையின் தடுப்பு சுவரில் மோதியது. இந்த விபத்தில் பொம்மிடியை சேர்ந்த பீட்டர்சிபு (வயது22) என்பவர் சம்பவ இடத்திலேயே பரிதாபமாக இறந்தார். மேலும் அவருடன் வந்த தர்மபுரி நந்தி நகரை சேர்ந்த தேவா (25), மற்றொரு மோட்டார் சைக்கிளில் வந்த கிருஷ்ணகிரி மாவட்டத்தை சேர்ந்த கவிராஜ் (25) ஆகிய 2 பேரும் படுகாயம் அடைந்தனர்.

இந்த விபத்து குறித்து தகவல் அறிந்ததும் தொப்பூர் போலீசார் மற்றும் சுங்கச்சாவடி ரோந்து படையினர் விரைந்து வந்து படுகாயம் அடைந்த 2 பேரையும் மீட்டு சிகிச்சைக்காக தர்மபுரி அரசு ஆஸ்பத்திரிக்கு அனுப்பி வைத்தனர். பின்னர் விபத்தில் உயிரிழந்த பீட்டர்சிபுவின் உடலை மீட்டு பிரேத பரிசோதனைக்காக தர்மபுரி அரசு ஆஸ்பத்திரிக்கு அனுப்பி வைத்தனர். 

இந்த விபத்து காரணமாக தர்மபுரி-சேலம் தேசிய நெடுஞ்சாலையில் 1 மணி நேரம் போக்குவரத்து பாதிக்கப்பட்டது. தொடர்ந்து டேங்கர் லாரி மற்றும் மோட்டார் சைக்கிள்களை போலீசார் அப்புறப்படுத்தி போக்குவரத்தை சீரமைத்தனர். விபத்து குறித்து தொப்பூர் போலீசார் வழக்குப்பதிவு செய்து விசாரணை நடத்தி வருகின்றனர்.