நொச்சியம் ஊராட்சியில் கிராமசபை கூட்டம்

பெரம்பலூர்,

பெரம்பலூர் மாவட்டத்தில் மே தினத்தையொட்டி 121 ஊராட்சிகளிலும் கிராமசபை கூட்டம் நடைபெற்றது. பெரம்பலூர் ஊராட்சி ஒன்றியம் நொச்சியம் ஊராட்சியில் நடைபெற்ற கிராமசபை கூட்டத்தில் உதவி இயக்குனர் (ஊராட்சிகள்) பாலன் கலந்து கொண்டார். இக்கூட்டத்தில் நொச்சியம் ஊராட்சியில் நடைபெற்ற வளர்ச்சித்திட்ட பணிகள் குறித்து பொதுமக்களுக்கு தெரிவிக்கப்பட்டு ஒப்புதல் பெறப்பட்டது. குடிநீர் சிக்கனமாக பயன்படுத்துதல், கிராம ஊராட்சி வளர்ச்சி திட்டம், அந்தியோதயா இயக்கம், கிராம ஊராட்சி நிர்வாகம் மற்றும் பொது நிதி செலவினம் குறித்து விவாதித்தல், திட்ட அறிக்கை, சுகாதாரம், மகாத்மா காந்தி தேசிய ஊரக வேலை உறுதிதிட்டம், இந்த ஆண்டு மேற்கொள்ளப்பட வேண்டிய பணிகள் குறித்தும் பொதுமக்களுடன் விவாதிக்கப்பட்டது. இதில் வட்டார வளர்ச்சி அலுவலர் ஆலயமணி, துணை வட்டார வளர்ச்சி அலுவலர் தனலட்சுமி மற்றும் அரசு அலுவலர்கள், பொதுமக்கள் பலர் கலந்து கொண்டனர்.