ஷர்வானந்த் நடித்துள்ள 'கணம்' படத்தின் டிரைலர் வெளியானது..!

சென்னை,

அறிமுக இயக்குனர் ஸ்ரீ கார்த்திக் இயக்கத்தில் உருவாகியுள்ள திரைப்படம் 'கணம்'. இந்த திரைப்படம் தமிழில் 'கணம்' என்ற பெயரிலும் தெலுங்கில் 'ஒகே ஒகே ஜீவிதம்' என்ற பெயரிலும் வெளியாக உள்ளது. இந்த படத்தில் நடிகர் ஷர்வானந்த் கதாநாயகனாக நடிக்கிறார். அவருக்கு அம்மாவாக நடிகை அமலா அக்கினேனி நடித்திருக்கிறார். மேலும், இந்த படத்தில் ரிது வர்மா, நாசர், சதீஷ், ரமேஷ் திலக், எம்.எஸ்.பாஸ்கர் உள்ளிட்ட பலர் நடித்துள்ளனர்.

நடிகர் ஷர்வானந்த் 'கணம்' படத்தின் மூலம் மீண்டும் தமிழ் சினிமாவில் அறிமுகமாகிறார். கடைசியாக 'எங்கேயும் எப்போதும்' திரைப்படத்தில் ஷர்வானந்த் நடித்திருந்தார் என்பது குறிப்பிடத்தக்கது. டிரீம் வாரியர் பிக்சர்ஸ் தயாரித்துள்ள இந்த படத்திற்கு ஜேக்ஸ் பிஜாய் இசையமைத்துள்ளார். சுஜித் சாரங் ஒளிப்பதிவு செய்துள்ளார். ஶ்ரீஜித் சாரங் படத்தொகுப்பு செய்துள்ளார்.

டைம் டிராவலை மையமாக கொண்டு உருவாகியுள்ள 'கணம்' திரைப்படம் வருகிற செப்டம்பர் 9-ம் தேதி வெளியாக உள்ளது. இந்த நிலையில் 'கணம்' திரைப்படத்தின் டிரைலர் தற்போது வெளியாகி உள்ளது. இந்த டிரைலரை இசையமைப்பாளர் அனிருத் தன்னுடைய சமூக வலைதளப்பக்கத்தில் வெளியிட்டார். இந்த டிரைலர் தற்போது இணையத்தில் வைரலாகி வருகிறது.