பொன்னியின் செல்வன் படம் எப்படி? ரசிகர்கள் கருத்து

தென்றல்:- பொன்னியின் செல்வனை பிரமாண்டமான திரைப்படம் என்பேன். ஒரு படத்திற்கு மிகப்பெரும் பலம் கதாபாத்திரங்கள் தேர்வு. அது இந்த படத்தில் கச்சிதமாக பொருந்தி உள்ளது. பொன்னியின் செல்வன் புத்தகத்தை படித்திருக்கிறேன். அதனால் தியேட்டருக்குள் ஒருவித எதிர்பார்ப்போடு சென்ற எனக்கு எந்த காட்சியிலும் தொய்வு ஏற்படவில்லை.

கண்களுக்கு விருந்தாக காட்சிகள், காதுகளுக்கு விருந்தாக இசை, பொன்னியின் செல்வன் நாவலை திரையில் கண்டது எல்லையில்லா மகிழ்ச்சி.

சோபியா:- படம் புத்தகத்தில் படித்த மாதிரி இல்லை. சில காட்சிகளில் ஏன் இந்த கதாபாத்திரம் வருகிறது என்ற குழப்பம் இருந்தது. அரண்மனை அரங்குகள் பிரமிக்க வைத்தன. சரித்திர காலத்து ஆடையில் நடிகர்-நடிகைகள் அழகாக தெரிந்தார்கள். பழைய காலத்துக்கு அழைத்து சென்ற உணர்வை ஏற்படுத்தியது. வந்தியத்தேவனாக வரும் கார்த்தியும் நந்தினியாக வரும் ஐஸ்வர்யாராயும் ஸ்கோர் செய்து இருந்தார்கள். விஷுவல் அபாரமாக இருந்தது. நிறைய கதாபாத்திரங்கள் இருந்ததால் சீக்கிரம் படம் முடிந்து விட்டது போன்ற உணர்வை தந்தது. சோழர்கள் வாழ்க்கையை இன்னும் கொஞ்சம் அதிகமாக காட்டி இருக்கலாம்.

ராஜ்குமார்:- நான் இதுவரை பொன்னியின் செல்வன் நாவலை படிக்கவில்லை. எதிர்பார்ப்பு இல்லாமல்தான் தியேட்டருக்குள் நுழைந்தேன். ஆனால் படத்தில் இடம்பெற்ற அரண்மனை காட்சிகள், இயற்கை எழில் கொஞ்சும் காடுகள், ராஜ உடைகள் எல்லாவற்றையும் பார்க்கும்போது ஆயிரம் வருடங்கள் பின்னோக்கி சென்ற பிரமிப்பு. நடிகர்களின் தமிழ் உச்சரிப்பு பிரமாதம். விக்ரம் நடிப்பிலும், பேச்சிலும் அசர வைத்துள்ளார். சில காட்சிகள் மெதுவாக நகர்ந்தன. தமிழில் இது போல் மீண்டும் ஒரு படம் வருமா? என்பது சந்தேகமே.

லாவினி:- கார்த்தி, ஜெயம் ரவி, திரிஷா, விக்ரம், என அனைவரும் நன்றாக நடித்து இருந்தனர். முக்கியமாக விக்ரம் மிரட்டினார். கார்த்தி கலகலப்பாக இருந்தார். படத்தின் முக்கியமான கதாபாத்திரமே ஐஸ்வர்யா ராய்தான். அவர் வரும் ஒவ்வொரு காட்சியிலும் என்னை மறந்து ரசித்து கொண்டிருந்தேன். கார்த்தியை நயவஞ்சகமாக பேசி மயக்கும்போதும், சரத்குமாரை வசியம் செய்யும் பார்வையிலும் முத்திரை பதித்து இருக்கிறார். நாவலை படிக்காதவர்களுக்கு கொஞ்சம் குழப்பம் வரும். சுவாரஸ்யமான படத்தை மணிரத்னம் கொடுத்துள்ளார்.

அபுதாகிர்:- நான் தியேட்டரில் மொபைல் போன் உபயோகப்படுத்தாமல் பார்த்த படம் இது மட்டுமே. காட்சிகள் சிலிர்க்க வைத்தது. ''பொன்னி நதி'' பாடல், சம்புவரையர் அரண்மனை பிரமாண்டம். ரவிவர்மனின் கேமரா சோழ சாம்ராஜ்ஜியத்தை பிரதிபலித்திருக்கிறது. குந்தவையும் நந்தினியும் சந்திக்கும் காட்சியில் தியேட்டரில் விசில் பறந்தது, பெண்கள் அதிகம் கொண்டாடியது அந்த காட்சியை தான். பொன்னியின் செல்வன் பாகம் 2-ஐ காண ஆவலாக உள்ளேன்.

ராஜா:- படம் சூப்பர். ரொம்ப நல்லா பண்ணியிருக்கார் மணிரத்னம். விஷுவல் பக்காவாக இருக்கு. கார்த்தி மிகவும் சிறப்பாக நடித்துள்ளார். அதற்கு அடுத்து என்னை கவர்ந்தது ஜெயராம் நடிப்பு. நல்ல படம் பார்க்கலாம். நான் பொன்னியின் செல்வன் நாவல் படிக்கவில்லை. படித்து இருந்தால் அதோடு ஒப்பிட்டு எதிர்மறை கருத்து சொல்லி இருப்பேன்.