நடிகர் கிங்காங் மகள் +2 பொதுத்தேர்வில் அசத்தல்
![நடிகர் கிங்காங் மகள் +2 பொதுத்தேர்வில் அசத்தல் நடிகர் கிங்காங் மகள் +2 பொதுத்தேர்வில் அசத்தல்](https://media.dailythanthi.com/h-upload/2024/05/06/1620504-6.webp)
நடிகர் கிங்காங்கின் மகள் +2 பொதுத்தேர்வில் 404 மதிப்பெண்கள் பெற்று தனது தந்தைக்கு பெருமை தேடித்தந்துள்ளார்.
தமிழ் சினிமாவில் நகைச்சுவைக்குப் பெயர் போனவர் நடிகர் கிங்காங். சங்கர் என்ற இயற்பெயர் கொண்ட இவர், நடிகர் ரஜினிகாந்தின் 'அதிசயபிறவி' படம் மூலம் நகைச்சுவை நடிகராக அறிமுகமானார்.
இவரது மனைவி கலா. இவர்களுக்கு இரண்டு மகள்களும் ஒரு மகனும் உள்ளனர். மூத்த மகள் சக்தி பிரியா பன்னிரெண்டாம் வகுப்பு மாணவி. இவர்தான் இன்று வெளியாகியுள்ள +2 தேர்வு முடிவுகளில் 404 மதிப்பெண்கள் வாங்கியுள்ளார்.
இந்த செய்தி கிங்காங் குடும்பத்தினரை மகிழ்ச்சியடையச் செய்துள்ளது. "என் மகள் எங்களைப் பெருமைப்பட வைத்துள்ளார். அவள் கனவை நிறைவேற்றுவதுதான் எங்கள் விருப்பம். கல்லூரியில் அவளுக்குப் பிடித்த படிப்பை படிக்க வைப்போம்" என்று நெகிழ்ந்துபோய் சொல்லி இருக்கிறார் கிங்காங்.
கவுண்டமணி, செந்தில், வடிவேலு, விவேக் உள்ளிட்ட பலருடன் நகைச்சுவை நடிகராக நடித்துள்ளார் கிங்காங். தமிழ், மலையாளம், கன்னடம், தெலுங்கு உட்பட ஐந்து மொழிகளில் 300க்கும் மேற்பட்ட படங்களில் நடித்துள்ளார் கிங்காங்.
சமீபத்தில் இவர் தனது மகளுடன் யூடியூப் சேனல் ஒன்றுக்கு பேட்டியளித்திருந்தார். அதில், கிங்காங்கின் உருவம் பற்றி அவரது மகள் சக்தி பிரியா பேசியபோது, "அப்பாவின் இந்த உருவம் பற்றி எனக்கு எந்தக் கவலையும் இல்லை. அவரை அப்படியே ஏற்றுக் கொண்டுள்ளோம். எனது நண்பர்கள் என் வீட்டிற்கு என்னைப் பார்க்க வருவதை விட அப்பாவை பார்க்கத்தான் அதிகம் வருவார்கள்" என்று சொல்லி இருந்தார்.
நடிகர் கிங்காங்கிற்க்கு 2017-ம் ஆண்டு பிப்ரவரி மாதம் வேலூரில் உள்ள ஒரு பல்கலைக்கழக கல்லூரியில் கௌரவ டாக்டர் பட்டத்தை வழங்கி இருந்தார்கள். அதுபோல சினிமாவில் இவருக்கு இவருடைய நடிப்பு திறமைக்காக தேசிய விருது வழங்கி உள்ளார்கள் என்பதும் குறிப்பிடத்தக்கது.