‘‘நல்ல படங்கள் அமைவது அபூர்வமாக இருக்கிறது’’ நடிகை டாப்சி சொல்கிறார்

மும்பை

‘‘நடிகைகளுக்கு நல்ல படங்கள் அமைவது கஷ்டமாக இருக்கிறது’’ என்று நடிகை டாப்சி கூறினார்.

நடிகை டாப்சி தமிழில் ஆடுகளம், வந்தான் வென்றான், ஆரம்பம், வை ராஜா வை, காஞ்சனா–2 என்று தொடர்ந்து முன்னணி கதாநாயகர்கள் படங்களில் நடித்தும் தற்போது அவருக்கு கைவசம் படங்கள் இல்லை. இதனால் இந்திக்கு போய் விட்டார். அங்கு அவருக்கு பட வாய்ப்புகள் குவிகிறது. ராணாவுடன் நடித்து தமிழ், தெலுங்கு, இந்தி ஆகிய 3 மொழிகளில் தயாரான காஸி படம் திரைக்கு வந்து ஓடிக்கொண்டு இருக்கிறது.

ரன்னிங் சாதி டாட்காம், தட்கா, நாம் ‌ஷபானா, ஜாத்வா–2 ஆகிய இந்தி படங்களிலும் நடித்துக்கொண்டு இருக்கிறார். நயன்தாரா, அனுஷ்கா, தமன்னா, காஜல் அகர்வால், திரிஷா உள்ளிட்ட நடிகைகள் கதாநாயகிகளுக்கு முக்கியத்துவம் உள்ள கதைகளில் நடித்துக்கொண்டு இருக்கின்றனர். தனக்கு அதுபோன்ற நல்ல கதை அமையவில்லை என்ற ஆதங்கம் டாப்சிக்கு இருக்கிறது. இதுகுறித்து டாப்சி அளித்த பேட்டி வருமாறு:–

‘‘நல்ல கதையம்சம் உள்ள படங்களில் நடிக்க வேண்டும் என்ற ஆர்வம் இருக்கிறது. ஆனால் அப்படிபட்ட கதைகள் கிடைப்பது அபூர்வமாக இருக்கிறது. தமிழ், தெலுங்கில் அதிக படங்களில் நடித்து இருக்கிறேன். தற்போது இந்தி படங்களிலும் நடித்து வருகிறேன். ‘பிங்க்’ படத்தில் அமிதாப்பச்சனுடன் நடித்தது மறக்கமுடியாத அனுபவமாக இருந்தது.

சமூகத்தில் பெண்கள் எவ்வளவு கஷ்டங்களை அனுபவிக்கிறார்கள். ஈவ் டீசிங் தொல்லைகளால் அவர்கள் வாழ்க்கை எப்படி துயரங்களுக்கு ஆட்படுகிறது என்பதை இந்த படத்தில் நடித்தபோது உணர்ந்து கொள்ள முடிந்தது.

நகைச்சுவை படங்களில் நடிப்பது எனக்கு மிகவும் பிடிக்கும். அதுமாதிரி கதைகளை தேடினேன். தற்போது இந்தியில் நான் நடித்துக்கொண்டு இருக்கும் ரன்னிங் சாதி டாட்காம் படம் நகைச்சுவை கதையம்சத்தில் தயாராகி வருகிறது.

படம் முழுக்க சிரித்துக்கொண்டே இருக்கலாம். தமிழ் படங்களில் நல்ல கதையம்சம் உள்ள படங்கள் வந்தால் நடிப்பேன்.’’

இவ்வாறு டாப்சி கூறினார்.