டெல்லி பிரீமியர் லீக்; சாம்பியன் பட்டம் வென்ற கிழக்கு டெல்லி ரைடர்ஸ்

புதுடெல்லி,

தமிழகத்தில் டி.என்.பி.எல். தொடர் நடத்தப்படுவதை போல் டெல்லியில், டெல்லி பிரீமியர் லீக் என்ற பெயரில் டி20 கிரிக்கெட் தொடர் இந்த ஆண்டு அறிமுகம் ஆனது. இந்த தொடர் கடந்த மாதம் 17ம் தேதி தொடங்கியது. இதில் மொத்தம் 6 அணிகள் கலந்து கொண்டன. மிகவும் எதிர்பார்க்கப்பட்ட டெல்லி பிரீமியர் லீக் தொடரின் முதலாவது சீசனின் இறுதிப்போட்டி நேற்று நடைபெற்றது.

இந்த போட்டியில் கிழக்கு டெல்லி ரைடர்ஸ் - தெற்கு டெல்லி சூப்பர்ஸ்டார்ஸ் அணிகள் மோதின. இந்த போட்டியில் முதலில் பேட்டிங் ஆடிய கிழக்கு டெல்லி ரைடர்ஸ் 20 ஓவர்களில் 5 விக்கெட்டை இழந்து 183 ரன்கள் குவித்தது. கிழக்கு டெல்லி தரப்பில் அதிகபட்சமாக மயங்க் ராவத் 78 ரன்கள் எடுத்தார்.

இதையடுத்து 184 ரன் எடுத்தால் வெற்றி என்ற இலக்குடன் களம் இறங்கிய தெற்கு டெல்லி அணி 20 ஓவர்களில் 9 விக்கெட்டை இழந்து 180 ரன்கள் மட்டுமே எடுத்தது. இதன் மூலம் 3 ரன்கள் வித்தியாசத்தில் கிழக்கு டெல்லி வெற்றி பெற்று சாம்பியன் பட்டத்தை வென்றது. தெற்கு டெல்லி தரப்பில் அதிகபட்சமாக தேஜஸ்வி தஹியா 68 ரன்கள் எடுத்தார். கிழக்கு டெல்லி தரப்பில் சிமர்ஜித் சிங், ரோனக் வஹேலா தலா 3 விக்கெட்டுகள் வீழ்த்தினர்.